रामेछापमा शनिबार भएको ५५ किलोमिटर लामो सुनापति–शैलुङ अन्तर्राष्ट्र्रिय अल्ट्रा म्याराथन प्रतियोगितामा सोलुका धावक सुमन कुलुङ प्रथम हुनुभएको छ । कुलुङले उक्त दुरी ५ घण्टा २६ मिनेट ५८ सेकेन्डमा पूरा गर्नुभयो ।
सुनापतिबाट बिहान ७ बजे सुरु भएको प्रतियोगिताका धावकहरु सुनापति डाँडा, खाँडादेवी मन्दिर, गाल्वा, अग्लेश्वर, दोरम्बा, डाँडाकटेरी, धारा, राजभीर गुफा, छांगा, घलेडाँडा हुँदै शैलुङ पुगेका थिए । प्रतियोगितामा वेदबहादुर सुनुवारले दोस्रो स्थान हासिल गर्नुभयो । उहाँले उक्त दुरी ५ घण्टा २९ मिनेट ४० सेकेण्डमा पूरा गर्नुभयो । त्यसैगरी धावक दुर्गाराज बुद्धले ५ घण्टा ४४ मिनेट २० सेकेण्डमा उक्त दुरी पूरा गरेर तृतीय स्थान हासिल गर्नुभयो ।
यसैगरी २५ किलोमिटर लामो सुनापति–शैलुङ अन्तर्राष्ट्रिय अल्ट्रा म्याराथन भने मोहन देव जोशीले जित्नुभएको छ । जोशीले उक्त दुरी ३ घण्टा ८ मिनेट ३९ सेकेण्डमा पूरा गर्नुभयो । उक्त म्याराथनमा देवराज महताराले ३ घण्टा १० मिनेट १० सेकेन्डमा उक्त दुरी पूरा गर्दै दोश्रो हुनुभयो । होमलाल श्रेष्ठले तृतीय स्थान हासिल गर्दै उक्त दुरी ३ घण्टा १४ मिनेट ५ सेकेण्डमा पूरा गर्नुभया ।
खेलमा ५५ किलोमिटर अन्तरगत प्रथम हुनेलाई ७५ हजार ,द्धितिय हुनेलाई ३५ हजार र तृतिय हुनेलाई २० हजार पुरस्कार प्रदान गरिएको छ । त्यस्तै २५ किलोमिटर अन्तरगत प्रथम हुनेलाई ४० हजार, द्धितिय हुनेलाई २० हजार र तृतिय हुनेलाई १० हजार पुरस्कार प्रदान गरिएको छ । त्यस्तै ५ किलोमिटर अन्तरगत प्रथम हुनेलाई १५ हजार, द्धितिय हुनेलाइ १० हजार र तृतियलाई ५ हजार पुरस्कार प्रदान गरिएको हो ।
