केहि दिन यता रामेछापमा दैनिक रुपमा ३० देखी ४० जनाको हाराहारीमा कोरोना संक्रमितहरु थपिने क्रम जारी छ । रामेछापमा आज मात्रै ३५ जना कोरोना सङ्क्रमित थपिएका छन । जिल्लामा अहिले १४८ जना कोरोनाका सक्रिय सङ्क्रमित रहेका छन ।
कोरोना संक्रमण नियन्त्रण गर्न जिल्ला प्रशासनले पनि २५ जनाभन्दा बढी भेला नहुन केहि दिन अघि सुचना प्रकाशन गरेर जानकारी गराएको छ । तर कोरोना संक्रमण जोखिमकै बिच रामेछापको पुरानो सदरमुकाम समेत रहेको रामेछाप नगरपालिका वडा नं ८ रामेछाप बजारमा भने आज विहिबारे हाट लागेको छ । निकै भिडभाड देखिने आजको हाटमा उपस्थित भएका केहि मानिसहरु बाहेक धेरैले न त मास्क लगाएका थिए,न त समाजिक दुरी नै कायम गरेका थिए ।
जिल्ला प्रशासन रामेछापले पनि मास्क नलगाउनेलाई कारबाहि गर्ने र जरीवाना समेत तिराउने भनिँरहँदा रामेछापको विहिबारे हाटमा भने प्रशासन र स्थानिय सरकारको खासै ध्यान गएको पाइएन । यसमा नागरीक आफै सचेत हुनुपर्ने त हो तर हाट बजार लाग्ने ठाउँको ढोकामै रहेको स्थानिय सरकार रामेछाप नगरपालिकाले पनि कडाई गर्नेपर्ने हो ।
सरकार र स्थानिय प्रशासनले बनाएको ऐन नियम र कानुनलाई कार्यन्वयन गराउने दायित्व स्थानिय सरकारको भएपनि कोरोनाको यो माहामारीमा विहिबारे हाटमा हजारौँ मानिसहरु सुरक्षा सतर्कता नअपनाई भिडभाड गर्दा समेत रामेछाप नगरपालिका भने मौन छ । यहि विहिबारे हाटको भिडभाडले कोरोना संक्रमण फैलने जोखिम झनै बढाएको भन्दै रामेछाप बजारका केही स्थानियले रामेछाप नगरपालिका किन मौन भन्दै प्रश्न गरेका छन ।
