चिकित्सकहरूले दक्षिण अफ्रिकामा फेला परेको कोरोनाको नयाँ परिवर्तित स्वरुप ओमिक्रोनको जोखिमबाट बच्न जनस्वास्थ्यका मापदण्ड पालन गर्न सुझाव दिएका छन् ।
सरुवारोग विशेषज्ञ डा.शेर बहादुर पुनले कोरोना महामारीको पहिलो र दोस्रो चरणको लहरको क्रममा जसरी स्वास्थ्य सावधानी अपनाइयो त्यसरी नै यसलाई आफ्नो जीवनभर लागु गर्नुपर्ने सुझाव दिनुभयो ।
उहाँले नेपालमा कोरोनाको ओमिक्रोन भित्रिनुमा भारतसँगको खुला सीमानाका प्रमुख कारणमध्येको एक रहेको हुँदा उच्च सतर्कता र सावधानी अपनाउनुपर्ने बताउनुभयो ।
उहाँले भारतमा कोरोनाको नयाँ स्वरुप ओमिक्रोन फेला परिसकेको र एकपछि अर्को गर्दै विभिन्न राज्यमा फैलिन थालेकाले खुला सीमा नाकाबाट नेपालमा पनि ओमिक्रोन प्रवेश गर्ने जोखिम उच्च हुँदा सम्बन्धित सबैले विशेष सावधानी अपनाउन आग्रह गर्नुभयो ।
हालसम्मको अवस्थालाई हेर्ने हो भने भारतमा कोरोना महामारीले तिव्रता पाएसँगै नेपालमा पनि जोखिम उच्च हुने गरेकोले सर्वसाधारण नागरिक, स्थानीय सरकार र सम्बन्धित सबैले आ–आफ्नो क्षेत्रबाट सावधानी अपनाउने र कडाई गर्नुपर्ने उहाँको भनाइ छ ।
डा.पुनले हालसम्म ओमिक्रोन भाइरस कतिसम्मको खतरनाक छ र यसले कोरोनाविरुद्धको खोपमा कसरी काम गर्छ भन्ने विषयमा ठोस अध्ययन नभइसकेकाले अहिले नै यो भाइरसको विषयमा केही भन्न नसक्ने पनि उल्लेख गर्नुभयो ।
साथै कोरोनाविरुद्धको खोप बनिसकेकाले अनिवार्य खोप लगाउन पनि उहाँले सुझाव दिनुभयो ।
