कोरोना भाईरस संक्रमणको उच्च जोखिममा रहेर जिल्ला अस्पताल रामेछापमा काम गर्दै आउनुभएका डाक्टर आनन्द आचार्य रामेछाप जिल्लाबाट विदाई हुनभएको छ । कोरोना संक्रमितहरुको उपचार तथा सम्भावित संक्रमितहरुको परीक्षणमा अग्रपंतिमा रहेर काम गर्दै आउनुभएका उहाँ सबैको मन जितेर विदाई हुनुभएको हो । जिल्ला अस्पताल रामेछापले डा आचर्यले यो कोरोनाको परिस्थितीमा खेल्नुभएको भुमिकाको प्रशंसा गर्दै एक कार्यक्रमको आयोजना गरी प्रशंसा पत्रसहित विदाई गरेको छ । यता रामेछाप नगरपालिकाले पनि डा आचार्यले सबैको मन जित्ने गरी काम गरेको भन्दै सम्मानका साथ विदाई गरेको छ । २ वर्षसम्म रामेछाप जिल्लामा रहेर विरामीहरुको सेवामा रातदिन नभनी खटिनुभएका डा आचार्यले रामेछापमा बसेर विरामीहरुको सेवा गरिहँदा आफुलाई कहिले पनि दिक्क नलागेको बताउनुभयो । यतिका समयसम्म रामेछापमा रहेर काम गर्दा आफुले परिवारसँगै बसेर काम गरे जस्तो अनुभव गरेको उहाँले बताउनुभयो । रामेछाप जिल्लाबाट नचाँहादा नचाहँदै आफु अर्को ठाउँमा जानु पर्ने अवस्था आएको भन्दै उहाँले फेरी पनि अवसर मिलेमा आफु रामेछापमै आउन तयार रहेको समेत बताउनुभयो । मिलनसार , मेहेनती र सबैसँग समन्वय गर्न सक्ने क्षमताका डा आचार्य चितवन स्थित मुगलीन हाईवय अस्पताल पुग्नुभएको छ ।
