जिल्ला अस्पताल रामेछापले प्रदान गर्ने सेवाहरुमा थप गरेको छ । २५ शैयाको जिल्ला अस्पतालले यहि श्रावण महिनादेखि लागु हुने गरी एक्सरे , प्रयोगशाला र मुख तथा दन्त सेवालाई थप तथा सुदृढ गरिएको अस्पताल विकास समितीका अध्यक्ष रोशन पाख्रिनले बताउनुभयो । प्रदेश ३ का आर्थिक मामिला तथा योजना मन्त्रि कैलाश प्रसाद ढुंगेलको पहलमा अस्पतालमा सेवाहरु थप तथा सुदृढ गरिएको उहाँले बताउनुभयो । बाग्मती प्रदेश सरकारले जिल्ला अस्पताललाई ४० लाखको गाडि समेत उपलब्ध गराएको छ ।
अस्पतालमा थप तथा सुदृढ गरिएका सेवाहरुमा एक्सरे तर्फ डिजिटल एक्सरे , दाँत तथा मुखको एक्सरे , प्रयोगशाला तर्फ थाईरोईड फङसन टेष्ट , भिटामिन डी , भिटामिन बी , रगत जम्ने तत्व सम्बन्धि जाँच , मुटु तथा कलेजोको रोग सम्बन्धि र रगतमा ग्लुकोजको तिन महिनाको अवस्था त्यसैगरी मुख तथा दन्त सेवा तर्फ दाँत भर्ने तथा जराको उपचार , सामान्य शल्यचिकित्सा विधिबाट दाँत निकाल्ने , कृतिम दाँत राख्ने तथा दाँतमा खोल राख्ने , मुख तथा दाँत सम्बन्धि सामान्य शल्य चिकित्सा सेवा र दाँत सम्बन्धि एक्सरे सेवा थप तथा सुदृढ गरिएको जिल्ला अस्पताल रामेछापले जनाएको छ ।यस अघि यि सेवाहरुको अभावमा विरामीहरु अन्य जिल्ला वा कुनै प्राईभेट अस्पतालमा जान बाध्य थिए । अब भने एक्सरे , प्रयोगशाला र मुख तथा दन्त सेवा जिल्ला अस्पतालमै सुरु भएपछि रामेछापका नागरीकहरुलाई सहज हुनेछ ।
