रामेछापको रामेछाप नगरपालिकाले गणतन्त्र दिवसको अवसरमा मंगलबार(आज) वडा नं ४ को विकट ठाउँ धारापनी बसेरीमा एकिकृत घुम्ती शिविर संचालन गरेको छ । नगरपालिकाका प्रमुख लबश्री न्यौपाने,उपप्रमुख बाल कुमारी कार्की,नगर प्रबक्ता समिर कार्की सहित नगरको टिम नै घुम्ती सेवा शिविर लिएर धारापनी बसेरी पुगेको हो ।
घुम्ती सेवा शिविरमा स्वास्थ्य,कृषि,पशु,जेष्ठ नागरीक परिचय पत्र वितरण लगाएतको विभिन्न सेवाहरु प्रदान गरिएको हो । घुम्ती शिविरमा स्वास्थ्य तर्फ १ सय ३८ जनाले सेवा लिएका छन । स्वास्थ्य सेवा तर्फ भिडियो एक्सरे,स्वास्थ्य परीक्षण र ५ जना सुत्केरी महिलालाई सुत्केरी कोसेली झोला समेत वितरण गरिएको हो । सुत्केरी कोसेली झोलामा घिउ,तेल र नवजात शिशुका लागी आवश्यक पर्ने विभिन्न समाग्रीहरु रहेका छन ।
रामेछाप नगरपालिकाका प्रशासन शाखा प्रमुख नारायण सुवेदीका अनुसार कृषि सेवा तर्फ १ सय ९० जना कृषकहरुले सेवा लिएका छन । पशु सेवा तर्फ २ सय १२ वटा गाई गोरु,१६ सय ५२ वटा बाख्रा,१ सय २२ वटा भैँसी र २ हजार ५२ वटा कुखुराहरुको लागी आवश्यक औषधि वितरण गरिएको हो । १५ वटा कुकुरलाई रेविज रोग विरुद्धको खोप लगाइएको छ भने २२ जना कृषकले आफुले पालेको गाई भैँसीको गोबर परीक्षण गराएका छन ।
प्रशासन शाखा प्रमुख सुवेदीका अनुसार ३५ जना जेष्ठ नागरीकले जेष्ठ नागरीक परिचय पत्र बनाएका छन । गणतन्त्र दिवसको दिन नगरपालिकाको टिम नै आफ्नो गाउँमा आएर सबै सेवाहरु दिएको भन्दै नागरीकहरु पनि खुशी भएका छन । नगरपालिकाले भौगोलिक रुपमा टाढा रहेका विभिन्न टोल बस्तीमा गएर समयसमयमा एकिकृत घुम्ती शिविर संचालन गर्दै आएको जनाएको छ ।
