आफ्ना पशुमा खोरेत रोगको सङ्क्रमण भएनभएको ख्याल गर्न विज्ञले सुझाव दिएका छन् । अहिले ओखलडुङगा, रामेछाप, सिन्धुली, बैतडी, डडेलधुरा र डोटी आसपासका जिल्लाका केही स्थानीय तहमा पालिएका पशुमा खोरेत रोगको सङ्क्रमण देखिएकाले सचेत हुन विज्ञले सुझाव दिएका हुन् ।
खोरेत तथा सीमा विहिन पशुरोग अन्वेसन प्रयोगशाला बुुढानिलकण्डमा कार्यरत डा. कृष्णराज पाण्डेले आफ्ना पशु चौपायामा खोरेत रोग लाग्न सक्ने भएकाले एक ठाउँबाट अर्को ठाउँमा लैजाँदा विशेष ख्याल गर्न सुझाव दिनुभयो । उहाँका अनुसार गत साउनयता हालसम्म दार्चुला, बैतडी, डडेलधुरा, डोटी, कालिकोट ओखलडुङगा, रामेछाप र सिन्धुलीका केही स्थानीय तहमा यो रोगको सङ्क्रमण पुष्टि भएको छ ।
गत वर्ष ४५ जिल्लाका पशुमा खोरेत फैलिएको थियो । खोरेत लागिसकेपछि यसको उपचार गर्न नसकिने भएकाले आफ्ना पशुचौपायालाई अनिवार्य खोप लगाउन पनि डाक्टर पाण्डेले आग्रह गर्नुभयो । खोरेत एक प्रकारको पशुहरूलाई लाग्ने सरुवा रोग हो । यो रोग खास गरेर घरमा पालिने गाई, भैंसी, बाख्रा आदीलाई लाग्दछ ।
