रामेछाप जिल्लाको पुरानो सदरमुकाम समेत रहेको रामेछाप नगरपालिका वडा नं ८ रामेछाप बजारमा स्थानियले कुखुरा छाडा छोडेर पाल्दा दुर्घटनाको जोखिम बढेको भन्दै वडा कार्यालयले सुचना जारी गरेको छ । वडा कार्यालयले जारी गरेको सुचनामा स्थानियले पाल्दै आएको घरपालुवा जनावर,पशुपंक्षी लगायत घर निर्माणका लागी सडक छेउछाउमा राखिएका निर्माण सामग्रीहरु एक हप्ता भित्र हटाउन भनिएको छ ।
घरपालुवा जनावर तथा पशुपंक्षीहरु छाडा नछाड्न वडा कार्यालयले अनुरोध गरेको छ । यदि वडा कार्यालयले जारी गरेको सुचनालाई बेवास्ता गरिए कारबाही गरिने वडाअध्यक्ष सन्तोष तामाङले बताउनुभयो । बजार आसपासमा कुखुरा छाडा छोडेर पालेको,सडक छेउछाउमा राखिएका निर्माण समाग्रीहरुले सडक नै अस्तव्यस्त बनाएको भन्दै वडा अध्यक्ष तामाङले बाध्य भएर सुचना जारी गर्नुपरेको बताउनुभयो । वडा कार्यालयले गरेको आग्रहलाई पालना गर्न उहाँले बजारबसीहरुलाई अनुरोध गर्नुभयो ।
रामेछाप माथिल्लो बजारमा अव्यवस्थित रुपमा बजारमै घर भएका शिक्षित व्यक्तिले नै छाडा छोडेर कुखुरा पाल्दै आएका छन । जसका कारण सोहि बाटो भएर आवात जावत गर्ने सवारी साधनहरुलाई कुखुरा छलेर बाटो छिचोल्ने मुस्किल हुने गरेको धेरैको गुनासो छ ।
निकै साँघुरो,धुलो उड्ने कालो पत्रे भत्केको सडकमा झन अव्यवस्थित रुपमा कुखुरा पाल्दा बजारको सौन्दर्यतासँगै दुर्घटनाको जोखिम बढेको भन्दै धेरैले गुनासो गर्ने गरेका थिए । यस अघि पनि रामेछाप नगरपालिकाले कुखुरा छाडा छाडेर नपाल्न आग्रह गर्दै बारम्बार चिठी पठाएको भएपनि बजारबासीले अटेर गर्दै आएका थिए ।
