अन्तर जिल्ला प्रथम खुला डुंगा दौड प्रतियोगिता आज रामेछाप स्थित सुनकोसी नदीमा सुरु भएको छ । राष्ट्रिय खेलकुद परिषद्का सदस्य सचिव टंकलाल घिसिङले प्रतियोगिता उद्घाटन गर्नुभएको छ । प्रतियोगितामा देशभरका २० टिमको सहभागिता रहेको छ । माझीको परम्परागत पेशाको संरक्षण र प्रवर्द्धन गर्ने उद्देश्यले उक्त प्रतियोगिताको आयोजना गरिएको हो ।
सुनकोसीमा परम्परागत सिमलको डुंगा चलाएर वारिपारि गर्ने उक्त प्रतिस्पर्धामा माझी समुदायले मात्र सहभागिता गर्न पाउनेछन् । एकल प्रतिस्पर्धातर्फ २ जना र डबलतर्फ ४ जना बसेर प्रतिस्पर्धा गर्नुपर्ने उक्त प्रतियोगिताको नियम छ । जसअन्तर्गत अधिकतम ५० मिटरको दूरीमा सुनकोसी वारिपारि गर्नुपर्ने हुन्छ ।
प्रतियोगितामा पहिलो, दोस्रो र तेस्रो हुनेलाई डबलतर्फ ३० हजार, २० हजार र १० हजार रुपैयाँ तथा एकलतर्फका विजेतामध्ये पहिलो हुनेलाई २० हजार, दोस्रो हुनेलाई १५ हजार र तेस्रो हुनेलाई १० हजार पुरस्कार राखिएको छ । मन्थली नगरपालिकाको सहयोगमा सञ्चालन हुन लागेको उक्त प्रतियोगितामा देशका विभिन्न जिल्लाका माझीहरूले सहभागिता जनाएका छन् । जिल्ला खेलकुद विकास समितिले स्थानीय व्यवस्थापनको जिम्मा लिएको प्रतियोगितामा माझी संस्कृति र परिकारको समेत व्यवस्था गरिएको माझी उत्थान संघले जनाएको छ ।
