यहि चैत्र १२ गते रामेछाप सामुदायिक खानेपानी तथा सरसफाई उपभोत्ता समितीले आफनो स्थापनाको २० औँ वार्षिक साधारण सभा भव्यताका साथ मनायो ।
रामेछाप नगरपालिकाका नगर प्रमुख नर ब थापा मगरको प्रमुख आतिथ्यता र रामेछाप सामुदायिक खानेपानी तथा सरसफाई उपभोत्ता समितीका अध्यक्ष गौतम कुमार श्रेष्ठको अध्यक्षतामा भएको कार्यक्रममा उपस्थित उपभोत्ताहरुले महंगोमा पानी किनेर खान बाध्य भएको भन्दै समितीको ध्यानाकर्षण गराएका छन ।
कार्यक्रममा उपस्थित अधिकांसले महंगोमा पानी किनेर खान बाध्य भएको,धारामा पर्याप्त पानी नआएको,पानीको धारा तथा पाईपहरु विग्रदा पनि समयमै प्राविधिक मर्मत गर्न नआएको जस्ता गुनासो गरेका छन । रामेछाप नगरपालिका ७ का उपभोक्ता तुलसा कार्कीले महिनाको ७ सय तिरेर खानेपानी उपभोग गर्दै आएका नागरीकहरुले केहि महिना यता ५ सयमा खानेपानी उपभोग गर्न पाएपनि त्यो रकम पनि निकै महंगो भएको बताउनुभयो ।
उहाँले खानेपानीको रकम तत्काल घटाएर उपभोत्तालाई सहज बनाउन आग्रह गर्नुभयो । अर्का उपभोक्ता राजु विक्रम बस्नेतले सम्भवत नेपालकै महंगो पानी पिउन आफुहरु बाध्य भएको बताउनुभयो । यसमा स्थानिय सरकारले पनि चासो दिनुपर्ने उहाँको भनाई थियो । रामेछाप सामुदायिक खानेपानी तथा सरसफाई उपभोत्ता समितीका अध्यक्ष गौतम कुमार श्रेष्ठले लिफ्ट प्रविधि मार्फत पानी तान्नुपर्ने भएकाले पनि खानेपानीको पैसा महंगो हुन गएको बताउनुभयो ।
लिफ्ट मार्फत खोलाको पानी तान्दा विजुलीको बिल धेरै चढ्ने भएकाले पनि बाध्य भएर खानेपानीको महसुल घटाउन नसकिएको उहाँले बताउनुभयो । समितीले महिनाको ७ सय रुपैयाँ महसुल दिँदै आएकोमा केहि महिनायता २ सय रुपैयाँ घटाएर अहिले महिनाको ५ सय रुपैयाँ लिँदै आएको छ । रामेछाप नगरपालिका वडा नं ७ र ८ का नागरीकहरुले उपभोग गर्दै आएको खानेपानी निकै महंगो भयो भन्दै नागरीकहरु जंगिएका छन । उनिहरुले अबको स्थानिय तहको निर्वाचनमा जसले सस्तोमा खानेपानी खुवाउँछ उसैलाई भोट दिने बताएका छन ।
