रामेछाप जिल्लामा शनिबार अर्थात आजसम्म १ हजार ३ सय २९ जनाको पीसीआर विधिबाट कोरोना भाइरस कोभिड १९ को परीक्षण गरिएको छ । यि मध्ये ५५ जनाको पिसिआर रिपोर्ट पोजेटिभ आएको छ भने १ हजार २ सय ७४ जनाको पीसीआर परीक्षण रिपोर्ट नेगेटिभ आएको छ । आज मात्रै रामेछाप जिल्लामा ५ जना प्रहरी सहित थप ६ जनामा कोरोना संक्रमण पुष्टि भएको छ । मन्थली नगरपालिका वडा नम्बर १ का ८६ वर्षिय एक महिला र जिल्ला प्रहरी कार्यालय रामेछापमा कार्यरत २७,४७,३८,३४ र २७ वर्षका ५ जना पुरुषमा कोरोना संक्रमण देखिएको स्वास्थ्य कार्यालय रामेछापका जनस्वास्थ्य अधिकृत भुवन थापाले जानकारी दिनुभयो ।
यसअघि विभिन्न समयमा कोरोना संक्रमण पुष्टि भएका ३७ जना कोरोना मुक्त भएर डिस्चार्ज भैसकेका छन् भने कोरोना संक्रमित १८ जनाको उपचार भैरहेको छ । १८ जना मध्ये ४ जना होम आईसोलेशन , २ जना प्रहरी हिरासत र १० जनाको जिल्ला अस्पतालमा उपचार भईरहेको स्वास्थ्य कार्यालय रामेछापले प्रेस विज्ञप्ती मार्फत जानकारी दिएको छ ।
अहिलेसम्म जिल्ला अस्पतालमा ८२ , तामाकोसी अस्पतालमा ६१ , मन्थली नगरपालिकामा ४ सय ३ , रामेछाप नगरपालिकामा १५१ , उमाकुण्ड गाउँपालिकामा १३४, खाँडादेवी गाउँपालिकामा ६५ , गोकुलगंगा गाउँपालिकामा २ सय १, दोरम्बा गाउँपालिकामा ४० , लिखुतामाकोशी गाउँपालिकामा १३१ र सुनापति गाउँपालिकामा ६१ जना गरी १३ सय २९ जनाकोे पीसीआर विधिबाट कोरोना परीक्षण गर्न स्वाब संकलन गरिएको स्वास्थ्य कार्यालय रामेछापले जानकारी दिएको छ ।
जिल्लाका ५६ जना क्वारेन्टिनमा
जिल्लाको विभिन्न पालिकाहरुमा आजसम्म ५६ जना क्वारेन्टिनमा रहेका छन । १५ जना महिला र ४१ जना पुरुष गरी ५६ जना क्वारेन्टिनमा रहेको स्वास्थ्य कार्यालय रामेछापले जनाएको छ । रामेछाप नगरपालिकामा २ , मन्थली नगरपालिकामा ४ , उमाकुण्ड गाउँपालिकामा २३ , गोकुलगंगा गाउँपालिकामा १९ र लिखुतामाकोशी गाउँपालिकामा ८ जना गरी जिल्लाभर ५६ जना क्वारेन्टिनमा रहेका छन् । दोरम्बा , खाँडादेवी र सुनापति गाउँपालिकामा भने कोहि पनि व्यक्ति क्वारेन्टिनमा बसेका छैनन् । जिल्लामा अहिलेसम्म ९८ बेडको आइसोलेशन कक्ष र ४ सय ९० बेडको क्वारेन्टिन कक्ष स्थापना गरिएको छ ।
