श्रमजीवि पत्रकारलाई दसैँ अगावै बाँकी बक्यौतासहित सबै प्रकारका सेवासुविधा उपलब्ध गराउन नेपाल पत्रकार महासंघले आग्रह गरेको छ । महासंघले विज्ञप्ती जारी गर्दै मिडिया व्यवस्थापन पक्षलाई गम्भीर बनेर बढ्दै गरेको श्रमजीवि पत्रकारको समस्या समाधान गर्न आग्रह गरेको हो ।
महासंघले कोरोना सङ्क्रमणको वहाना बनाइ पत्रकारलाई निष्काशन गर्ने, दवावपूर्ण बिदामा राख्ने, तलब–भत्ता कटौती गर्ने, अनुचित सरुवा गर्ने र नियमित पारिश्रमिक नदिने लगायतका कार्य तत्काल रोक्न भनेको छ ।
जटिल समस्या देखिएका सञ्चार गृहविरुद्ध दवावमूलक सङ्घर्ष अघि बढाउने निर्णय पनि गरेको महासंघका महासचिव रोशन पुरीले जानकारी दिनुभयो । जटिल समस्या देखिएका सञ्चार गृहको अनुगमन गरि सञ्चार गृह घेराउ, अनशनसहित संघर्षका कार्यक्रम अघि बढाउन देशभरका शाखा, एशोसिएट तथा प्रदेश समितिलाई महासंघले आग्रह गरेको छ ।समस्या समाधान गर्न सञ्चार गृह तयार नभए असोज १७ गतेपछि संघर्षका थप कार्यक्रम अघि बढाइने नेपाल पत्रकार महासंघले जनाएको छ ।
