कोरोना महामारीका बीच पनि बैँक तथा वित्तीय संस्थामा शेयर खरिदको अनलाइन खाता खोल्ने भीड रोकिएको छैन । विभिन्न कम्पनीको प्राथमिक शेयर किन्न मागको कयौं गुणा बढी आवेदन पर्नुले पनि नागरिकमा प्राथमिक शेयरप्रतिको आकर्षण बढेको देखिन्छ ।
तर सेयर किन्न भन्दा बेच्न गाह्रो हुने गरेको आमसर्वसाधारणको गुनासो छ ।काठमाडौँ धापासीका शान्ति अधिकारी जुनसुकै कम्पनीले आइपीओ निष्काशन गरे पनि आवेदन भरिहाल्नुहुन्छ ।
शेयरमा थोरै लगानी गर्दा पनि बढ्छ र नाफा हुन्छ भन्ने लागेर लगानी गरेको उहाँ बताउनुहुन्छ । उहाँ मात्रै होइन शेयरका बारेमा सहर बजारसँगै गाउँघरमा पनि चासो देखिन थालेको छ । कोरोनाको जोखिम भएपनि धितोपत्रलाई विद्युतीय प्रणालीमा अभिलेख गरिने डिम्याट खाता खोल्नेहरू बढेका छन् ।
शेयर किनबेच गर्दा नाफाका लागि सावधानी अपनाउनुपर्ने नेपाल पुँजी बजार लगानीकर्ता संघका अध्यक्ष राधा पोखरेलको भनाई छ । शेयर किनेपछी भन्दा पनि शेयर किन्नु अघि कम्पनीका बारेमा राम्रो जानकारी राख्नुपर्ने उहाँको सुझाव छ ।
कुनै कम्पनीले खुला गरेको आइपीओ प्राप्त भएमा त्यसलाई प्राथमिक शेयर शेयर भनिन्छ भने अरुबाट किनेर कारोबार गर्नुलाई दोस्रो शेयर बजारको रुपमा चिनिन्छ ।
सेयरमा आकर्षण बढ्दै जाँदा अहिलेसम्म ४० लाख ७३ हजारभन्दा बढीले डिम्याट खाता खोलिसकेका छन् भने २ सय २० वटा कम्पनीबाट किनबेच हुन्छ । शेयरबाट फाइदा मात्रै नहुने शेयर बजारका एकजना अध्येता ज्योती दाहालको भनाई छ ।
डिम्याट खाताका लागि विभिन्न बैँकमा आवेदन दिन लाम लाग्नुपर्ने बाध्यता केही समयअघिसम्म थियो तर अहिले इन्टरनेटबाट पनि आवेदन दिन सकिने व्यवस्था गर्ने प्रतिस्पर्धा चलेको छ ।
शेयर लगानी गर्दा किन मुल्य बढ्छ किन मुल्य घट्छ भन्ने कुराको राम्रो जानकारी राख्नुपर्ने नेपाल स्टक एक्सचेक्ज नेप्सेका प्रवक्ता मुराहरी पराजुलीले बताउनुभयो । २०३३ सालमा सेक्युरिटी खरिद बिक्री केन्द्र स्थापना भएपछि नेपालमा शेयर किनबेच संस्थागत भएको हो ।
त्यसको ४२ वर्षपछि नेप्सेले स्वचालित विद्युतीय कारोबार प्रणाली शुरु गरेपछि अनलाइन प्रविधिमार्फत शेयर कारोबार गर्न सकिने भएको हो ।
