बिहिबार दिउँसो रामेछापको रामेछाप नगरपालिका वडा नं ९ टार गाउँमा भएको भिषण आगलागीबाट २६ वटा घर गोठ जलेर नष्ट हुँदा एक करोड ८६ लाख बढीको क्षति भएको छ । आगोलागिबाट १२ घरपरिवारका ८५ जना विस्थापित भएका छन् । हरदेनि सामुदायिक बनमा लागेको डढेलो बस्तीमा पस्दा यति धेरै क्षति भएको हो ।
जिल्ला प्रहरी कार्यालय रामेछापका अनुसार आगलागिबाट एक करोड ८६ लाख ३१ हजार बराबरको क्षति भएको छ । बनमा लागेको डढेलो हावाहुरीका कारण बस्तीमा छिरेको थियो । आगोले स्थानीयको घर गोठ र पशुचौपायाको क्षति धेरै क्षति गरेको छ । आगोलागिबाट स्थानीय महेशलाल तामाङको ३ लाख ७५ हजार,नर बहादुर तामाङको ३ लाख, सर्किनी तामाङको २ लाख ७५ हजार, धन बहादुर तामाङको चार लाख ५० हजार, पूर्ण बहादुर तामाङको २१ लाख ८५ हजार, धनमाया श्रेष्ठको ५१ लाख ५ हजार, रमेश श्रेष्ठको १५ लाख ९५ हजार, उत्तरकुमारी श्रेष्ठको ३१ लाख २४ हजार, सिताराम नेवारको १६ लाख ७० हजार, मीन बहादुर नेवारको ६ लाख, मानकुमारी नेवारको २७ लाख १२ हजार र बम बहादुर श्रेष्ठको १५ लाख १० बराबरको क्षति भएको प्रहरीले जनाएको छ ।
घर भित्र रहेको धनमाल,अन्नपात,लत्ताकपडा सबै जलेर खरानी भएको हो । गोठमा बाँधिएका भैँसी,गोरु र ५० वटा भन्दा बढी खसी,बाख्रा आगोले जलेर मरेका छन । बस्ने घर,खाने अन्न र ओढ्ने कपडा सबै जलेर खरानी भएपछि उनिहरु निकै पिँडामा छन । बाग्लो बस्ती रहेको टार गाउँका अधिकांश घरहरु जलेको अवस्थामा छन । आगोलागीबाट मानविय क्षती नभए पनि भौतिक र पशु चौपायामा धेरै क्षती भएको छ ।
अग्नी पीडितलाई जिल्ला विपद् व्यवस्थापन रामेछापकी संयोजक तथा प्रमुख जिल्ला अधिकारी अनिता निरौलाले शुक्रवार तत्कालको लागि आवश्यक पर्ने खाद्यान्न तथा पाल लगायत अति आवश्यक सामाग्री वितरण गर्नुभयो । रामेछाप नगरपालिका र मन्थली नगरपालिकाले पनि अग्नि पीडितलाई आफ्नो स्थानीय तहको तर्फबाट छुट्टा छुटै भेटेर आवश्यक खाद्यान्न लगायतका सामाग्री वितरण गरेको छ । अन्य विभिन्न निकाय,संघसंस्था तथा व्यक्तिहरुले पनि अग्नि पीडितलाई सहयोग गर्ने क्रम जारी रहेको वडा नं ९ का वडाअध्यक्ष चन्द्र श्रेष्ठले जानकारी दिनुभयो ।
