रामेछापको मन्थली नगरपालिकामा संचालित विकास आयोजना तथा कार्यक्रमहरुको प्रभावकारीता तथा सेवा प्रवाहको अवस्था विषयक सार्वजनिक सुनुवाई कार्यक्रम शुक्रबार सम्पन्न भएको छ । सार्वजनिक सुनुवाई कार्यक्रममा नगरपालिकाका प्रमुख प्रशासकिय अधिकृत हरि प्रसाद चापागाईले नगरको प्रथम चौमासिक अबद्यिसम्म भएको कामहरुको बारेमा जानकारी गराउनुभयो ।
उहाँले यहि साउनदेखी हालसम्म नगरपालिका मार्फत संस्थागत विकास तथा सुशासनको क्षेत्रमा भएका कामहरु,आर्थिक विकास,समाजिक विकास,पूर्वाधार विकास आयोजना,विपद व्यवस्थापन र न्यायिक समिति मार्फत भएको प्रगति लगायत विभिन्न क्षेत्रमा भएको प्रगति प्रतिवेदन प्रस्तुत गर्नुभयो ।
सार्वजनिक सुनुवाईमा प्रगति प्रतिवेदन प्रस्तुत पछि कार्यक्रममा सहभागी नागरीकहरुले प्रश्न,जिज्ञासा सहित सुझाव सल्लाह दिएका थिए । नागरीकले शिक्षा,स्वास्थ्य,कृषि,सडक,पशुपालन र खानेपानी क्षेत्रसँग सम्बन्धित प्रश्न गरेका थिए । नागरीकहरुले सोधेको प्रश्नको जवाफ मन्थली नगरपालिकाका प्रमुख लव श्रेष्ठ,प्रमुख प्रशासकिय अधिकृत हरि प्रसाद चापागाइ र सम्बन्धित वडाका वडाअध्यक्षहरुले दिनुभयो ।
सो कार्यक्रममा नागरीकले सोधेको प्रश्नको जवाफ दिँदै मन्थली नगरपालिकाका प्रमुख लब श्रेष्ठले अब चाडै नगरका सबै वडा कार्यालयबाट राजश्व तिर्ने व्यवस्था गर्ने बताउनुभयो । सबै वडाका नागरिकलाई वडा कार्यालयबाटै राजश्व तिर्न सक्ने व्यवस्था गर्न नगरपालिकाले आवश्यक तयारी गरिरहेको उहाँले बताउनुभयो ।
नगरका सबै वडा कार्यालय,विद्यालय,स्वास्थ्य संस्था लगायतका संस्थाहरूमा इन्टरनेटको व्यवस्थापन गरिएको उहाँको भनाई । नगरपालिकाले वडा स्तरमा उत्पादन भएका कृषि उपजहरूको बजारीकरणका लागि सटही पसल सञ्चालनको तयारी गरिरहेको नगर प्रमुख श्रेष्ठले बताउनुभयो । नगरपालिकाले व्यक्तिगत हितको भन्दा पनि सामूहिक हित हुने योजना तथा कार्यक्रमहरूलाई प्राथमिकता दिएर अगाडी बढिरहेको उहाँको भनाई छ ।
वडा नं १३ का वडा अध्यक्ष नवराज थापामगरको अध्यक्षता र मन्थली नगरपालिका प्रमुख लव श्रेष्ठको प्रमुख आतिथ्यतामा कार्यक्रम भएको हो । मन्थली नगरपालिका वडा नं १३ मा भएको सार्वजनिक सुनुवाइ कार्यक्रमको सहजीकरण हजुरको रेडियोले गरेको थियो ।
