यो वर्ष रामेछाप जिल्लामा १८ प्रतिशत खेतमा मात्रै धान रोपाइँ सम्पन्न भएको छ । असार महिनाको १५ गते बितिसक्दा रामेछाप जिल्लामा १८ प्रतिशत खेतमा मात्रै धान रोपाइँ सम्पन्न भएको कृषि ज्ञान केन्द्र रामेछापका सूचना अधिकारी शर्मिला फुयाँले जानकारी दिनुभयो ।
उहाँका अनुसार जिल्लाको गोकुलगङ्गा, उमाकुण्ड, र दोरम्बा शैलुङ गाउँपालिका लगायतका क्षेत्रका गरी जम्मा १८ प्रतिशत खेतमा मात्रै धान रोपाइँ भएको छ । रामेछाप जिल्लाभर ७ हजार ८ सय ५९ हेक्टर खेतमा धान रोपाइँ हुँदै आएको छ ।
गोकुलगङ्गा, उमाकुण्ड, दोरम्बा सैलुङ गाउँपालिकाका एक हजार ४१४ दशमलव ६२ हेक्टर खेतमा रोपाइँ भइसकेको छ । कृषि ज्ञान केन्द्र रामेछापका अनुसार गत वर्ष धान रोपाइँ हुने ७ हजार ८ सय ५९ हेक्टर खेत मध्ये यो अवधिसम्म २६ प्रतिशत अर्थात् दुई हजार ४३ दशमलव ३४ हेक्टर खेतमा रोपाइँ भएको थियो । जिल्लाका अधिकांश ठाउँहरुमा आकाशे पानीको भरमा धान रापाइँ हुँदै आएको छ ।
