बीमा दाबीको प्रक्रिया झन्झटिलो हुँदा कृषि बीमा प्रति रामेछापका किसानको आकर्षण बढ्न सकेको छैन । बालीनाली र पशुपालनमा किसानले ब्यहोर्नु पर्ने सम्भावित क्षतिको जोखिम कम गर्न सरकारले कृषि बीमा कार्यक्रम लागु गरेको छ । बीमा गर्न इच्छुक किसानलाई बिमाङ्कको ८० प्रतिशत रकम सरकारले व्यहोर्ने भएपनि बीमा दाबीको प्रक्रिया झन्झटिलो भएका कारण किसानहरू कृषि बीमा कार्यक्रम प्रति आकर्षित नभएका हुन् ।
बीमा गर्दा विमाङ्कको ८० प्रतिशतसम्म सरकार र बाँकी २० प्रतिशत किसानले बेहोर्नु पर्छ । कृषि बीमाका लागि बीमा कम्पनीलाई आग्रह गरेपनि चासो नदिने गरेको किसानको गुनासो छ । बीमा सम्झौतासम्मको समय सिमा भित्रै किसानलाई क्षति भएमा बीमा कम्पनीले अधिकतम ९० प्रतिशतसम्म क्षतिपूर्ति दिने गर्छ । तर क्षतिपूर्तिको रकमका लागि किसानले पाउने रकमभन्दा बढी खर्च गर्नुपर्ने झन्झटिलो प्रक्रिया रहेको किसानले गुनासो गरेका छन् ।
