मौन अवधिमा मतदाता प्रभावित पार्न हुनसक्ने सबै प्रकारका चलखेल रोक्न सबै संयन्त्र सक्रिय रहेको निर्वाचन आयोगले जनाएको छ । दलका उम्मेदवारहरू मौन बस्ने र मतदाताले सही मताधिकार प्रयोग गर्ने समयको रूपमा मौन अवधिलाई लिइन्छ । मौन अवधिमा उम्मेदवारले भोट माग्न, घरदैलो कार्यक्रम गर्न, सञ्चार माध्यमबाट प्रचार प्रसार गर्न पाउँदैनन् । मौन अवधि उम्मेदवार तथा दलहरूलाई मात्र नभएर सर्वसाधारणमा समेत लागू हुन्छ ।
यस अवधिमा कुनै प्रकार वा माध्यमबाट मतदातालाई प्रभावित पार्ने गतिविधि गर्न नहुने आयोगले जनाएको छ । यस्ता गतिविधि हुन नदिन आयोगले यस पटक विषेश सर्तकता अपनाएको बताएको छ । जसका लागि मुख्य निर्वाचन अधिकृतको संयोजकत्वमा जिल्लामा अनुगमन संयन्त्र गठन गरिएको आयोगका सहप्रवक्ता सुर्यप्रसाद अर्यालले बताउनुभयो ।
मौन अवधिमा विभिन्न आश्वासन, प्रलोभन, डर, धाक, दबाब वा प्रभावमा पारी मतदातालाई आतङ्कित पार्ने, जस्ता कार्य नगर्न नगराउन गृह मन्त्रालयले समेत आग्रह गरेको छ । मौन अवधिमा हुने गतिविधिलाई गृहले निरिक्षण गरिरहने र कहिँ कतै निर्वाचन आचारसंहिता विपरित गतिविधि भए तुरुन्तै कारवाही गरिने मन्त्रालयका प्रवक्ता फणिन्द्रमणी पोखरेलले बताउनुभयो ।
पछिल्लो समय प्रचार प्रसारको माध्यमसमेत बन्दै आएको सामाजिक सञ्जाललाई पनि आयोगले यसपटक निगरानीमा राखेको छ । आयोग अन्तर्गतको मिडिया अनुगमन एकाइले सामाजिक सञ्जालमा मौनअवधि उल्लङ्घन भए–नभएको अनुगमन गर्नेछ र उल्लङ्घन भएको पाईए कारवाही पनि हुनेछ ।
