रामेछापमा पनि आजबाट टाइफाइड रोग विरुद्धको खोप अभियान सुरु भएको छ । स्वास्थ्य कार्यालय रामेछापमा रामेछापका प्रमुख जिल्ला अधिकारी दिपक कुमार पहाडीले खोप अभियानको शुभारम्भ गर्नुभयो । खोप अभियानको पहिलो दिन आज गंगालाल एकेडेमीका १४ जना विद्यार्थीलाई खोप लगाइएको छ ।
जिल्लाभरका ४४ हजार ४ सय १० जना बालबालिकालाई खोप लगाइने जिल्ला स्वास्थ्य कार्यालय रामेछापका प्रमुख जितेन्द्र शाहले बताउनुभयो । उहाँका अनुसार ३६ हजार ३ सय ३० जना विद्यालयका बालबालिका र विद्यालय बाहिरका ८ हजार ८७ जना बालबालिकालाई टाइफाइड विरुद्धको खोप लगाउने लक्ष्य छ । १५ महिनादेखि १५ वर्षसम्मका बालबालिकालाई खोप लगाउनका लागि जिल्लामा २९० वटा खोप केन्द्र तोकिएको छ ।
