रामेछाप जिल्लामा ‘सुरक्षित नागरिक आवास कार्यक्रम’ अन्तर्गत घरको छाना फेर्न अनुदान लिन कसैको पनि आवेदन परेको छैन । सरकारले असुरक्षित छानामुनि बसोबास गरिरहेकालाई लक्षित गरी यो कार्यक्रम अघि बढाएको हो । गत वर्षसम्म छाना फेर्न ५० हजार रुपैयाँ दिने गरिएकामा चालु आवमा प्रतिपरिवार ७५ हजार रुपैयाँ दिने जनाइएको छ । उक्त रकम लाभग्राहीले सम्झौता गरेपछि २ किस्तामा उपलब्ध गराइन्छ ।
सहरी विकास मन्त्रालयमार्फत सञ्चालित कार्यक्रमको अपेक्षित लाभग्राही पहिचानका लागि स्थानीय तहलाई अनुरोध गरिए पनि आवेदन नपरेको सघन सहरी तथा भवन निर्माण आयोजना रामेछापले जनाएको छ । २०७२ को विनाशकारी भूकम्पबाट अति प्रभावित रामेछापमा अधिकांश परिवारले निजी आवास पुनर्निर्माणका लागि अनुदान लिएकाले पनि छाना फेर्ने घरपरिवार नभेटिएको हुन सक्ने आयोजनाको भनाइ छ । सुरक्षित नागरिक आवास कार्यान्वयन कार्यविधि २०७५ मा कुनै निकायबाट आवास पुनर्निर्माणका लागि अनुदान पाएको व्यक्तिले सुरक्षित आवास सुविधाको अनुदान नपाउने उल्लेख छ । ८ वटै पालिकामा २५ परिवारका दरले अनुदान दिइनेछ ।
(हामिले यो समाचार ईकान्तिपुरबाट लिएका हौँ )
