फागुन २१ गते हुने प्रतिनिधिसभा निर्वाचनका लागि रामेछाप जिल्लाका ४१ वटा मतदान स्थललाई अति संवेदनशील सूचीमा राखिएको छ । सुरक्षा अवस्थाको मूल्यांकन गर्दै जिल्ला सुरक्षा निकायले यस्तो वर्गीकरण गरेको हो ।
दुई नगरपालिका र ६ गाउँपालिका गरी ६४ वडा रहेको रामेछापमा कुल ९६ मतदान स्थल र २२८ मतदान केन्द्र रहेका छन् । एक मात्र निर्वाचन क्षेत्र रहेको जिल्लामा मतदान शान्तिपूर्ण र व्यवस्थित बनाउन सुरक्षा रणनीति कडाइका साथ लागू गरिएको जनाइएको छ ।
जिल्ला प्रहरी कार्यालय रामेछापका प्रमुख (डिएसपी) भोलाकुमार भट्टका अनुसार अघिल्लो निर्वाचनको अनुभव, भौगोलिक बनावट, सुरक्षा पेरिमिटर र पूर्वाधारको अवस्थालाई आधार मानेर मतदान स्थललाई सामान्य, संवेदनशील र अति संवेदनशील गरी वर्गीकरण गरिएको हो । उहाँका अनुसार ४१ वटा अति संवेदनशील, ३५ वटा संवेदनशील र २० वटा मतदान स्थल सामान्य श्रेणीमा परेका छन् ।
उहाँले सुरक्षाको दृष्टिले सामान्य भनिएका मतदान स्थल पनि पूर्ण रूपमा जोखिममुक्त नरहेको उल्लेख गर्दै सम्भावित जोखिमको आकलनका आधारमा सुरक्षाकर्मी परिचालन गरिएको बताउनुभयो । अनुगमनका क्रममा करिब १५–१६ मतदान स्थलमा काँडे तार वा सुरक्षा पेरिमिटर नभएको पाइएको र आवश्यक व्यवस्था मिलाउन स्थानीय तहलाई परिपत्र गरिएको उहाँले बताउनुभयो ।
डिएसपी भट्टका अनुसार जिल्लाका ३१ मतदान स्थलमा हाल सीसी क्यामेराबाट निगरानी भइरहेको छ । अन्य स्थानमा पनि सम्भव भएसम्म सीसी क्यामेरा जडान गर्न स्थानीय तह, विद्यालय प्रशासन र मतदान व्यवस्थापन समितिलाई सुझाव दिइएको छ ।
निर्वाचन सुरक्षाका लागि जिल्लामा उपलब्ध प्रहरी जनशक्तिसँगै तालुक कार्यालयबाट थप सुरक्षाकर्मी मगाइएको छ । खटिने प्रहरीहरूलाई युनिटगत रूपमा परिचालन गरिसकिएको र मतदानको ३–४ दिनअघि सम्बन्धित स्थलमा पठाइने तयारी छ । उनीहरूलाई घेरा सुरक्षा, परिचालन विधि तथा आकस्मिक अवस्थाको कार्ययोजनाबारे विस्तृत ब्रिफिङ गरिएको प्रहरीले जनाएको छ ।
कुनै स्थानमा समस्या देखिएमा नेपाल प्रहरी, सशस्त्र प्रहरी बल र नेपाली सेनाबीच समन्वय गरी कम्बाइन्ड सुरक्षा रणनीति लागू गरिने सुरक्षा निकायको तयारी छ । हालको तयारीका आधारमा निर्वाचन स्वतन्त्र, निष्पक्ष र धाँधलीरहित हुनेमा जिल्ला प्रहरी कार्यालय विश्वस्त रहेको डिएसपी भट्टले बताउनुभयो ।
यसैबीच, जिल्ला निर्वाचन कार्यालय रामेछापका निर्वाचन अधिकृत नारायण लामिछानेका अनुसार जिल्लामा १ लाख ८७ हजार ९५२ मतदाता रहेका छन् । त्यसमध्ये २ हजार ४२२ अस्थायी मतदाता रहेका छन् । निर्वाचनमा तीन जना स्वतन्त्रसहित १४ राजनीतिक दलका गरी १७ उम्मेदवार चुनावी प्रतिस्पर्धामा रहेका छन् ।
