रामेछापको सुनापति गाउँपालिकामा सातौँ सुनापति राष्ट्रपति रनिङ शिल्ड प्रतियोगिता सम्पन्न भएको छ । प्रतियोगितामा उत्कृष्ट प्रदर्शन गर्दै कृष्णपुरी माध्यमिक विद्यालय, सुनापती–५ रुपाकोटले ७ स्वर्ण पदक सहित समग्र नतिजा आफ्नो पक्षमा पार्दै यस वर्षको रनिङ सिल्ड उपाधि जितेको छ ।
प्रतियोगितामा डहु माध्यमिक विद्यालय, सुनापती–४ डहुले ४ स्वर्ण पदक प्राप्त गर्दै दोस्रो स्थान हासिल गरेको छ भने पशुपति माध्यमिक विद्यालय, सुनापती–३ नागसिवाले ३ स्वर्ण पदक सहित तेस्रो स्थानमा रहन सफल भएको छ ।
त्यस्तै कृष्णवर्णेश्वर माध्यमिक विद्यालय, सुनापती–२ मानपुर र कुशेश्वर माध्यमिक विद्यालय, सुनापती–४ बेथानले समान २–२ स्वर्ण पदक जितेका छन् । सतलिङ्गेश्वर माध्यमिक विद्यालय, सुनापती–१ गुन्सी र जलदेवी माध्यमिक विद्यालय, सुनापती–५ खनियापानीले प्रत्येकी १–१ स्वर्ण पदक जितेका छन् ।
अग्लेश्वर माध्यमिक विद्यालय, सुनापती–२ दिमीपोखरी र बाल माध्यमिक विद्यालय, सुनापती–५ भिरकोट भने यस वर्षको प्रतिस्पर्धामा स्वर्ण पदकविहीन बनेका छन् ।
प्रतियोगिता सुनापती गाउँपालिकाका अध्यक्ष ठुलोकान्छ तामाङको प्रमुख आतिथ्यमा सम्पन्न भएको हो । कार्यक्रममा गाउँपालिका उपाध्यक्ष गीता विष्ट विशिष्ट आतिथिका रूपमा उपस्थित रहनुभएको थियो ।
प्रतियोगिता सम्पन्न समारोहमा विजेता विद्यालयहरूलाई पदक, प्रमाणपत्र र ट्रफी प्रदान गरिएको थियो ।
