पहिलो जननिर्वाचित प्रधानमन्त्री बिपी कोइरालाको ११२ औँ जन्मजयन्तीको अवसरमा रामेछापमा अस्पतालहरुमा रहेका बिरामीलाई फलफूल वितरण गरिएको छ ।
मंगलबार(आज) बिहान मन्थली स्थित बिपीको शालिकमा माल्यार्पण गरे पश्चात रामेछाप अस्पताल,मन्थली अस्पताल,तामाकोशी अस्पताल र रामेछाप सामुदायिक अस्पतालमा वेड भर्ना भएका बिरामीहरुलाई फलफूल वितरण गरिएकोे हो ।
नेपाली कांग्रेस रामेछापका सभापति एवं प्रतिनिधि सभा सांसद पूर्ण बहादुर तामाङ(कान्छाराम) सहितका नेता कार्यकर्ताहरु अस्पतालमै पुगेर बिरामीको शिघ्र स्वास्थ्य लाभको कामना गर्दै फलफूल वितरण गरेका हुन ।
नेपालमा प्रजातन्त्रको स्थापना एवं पुनःस्थापनाका लागि कठोर सङ्घर्ष गरेका कोइरालाको विसं १९७१ भदौ २४ गते जन्म भएको थियो । जहानियाँ राणा शासनको विरोधमा उनका पिता कृष्णप्रसाद कोइरालाले गरिब किसानले पहिरेको कपडा राणा प्रधानमन्त्री चन्द्रशम्शेरलाई पार्सल गरी पठाएपछि कोइराला परिवार भारत निर्वासनमा जानु परेको थियो ।
