रामेछापको रामेछाप नगरपालिका यहि भदौ २१ गते शनिबार बालमैत्री स्थानीय शासनयुक्त पालिका घोषणा हुने भएको छ । बाल अधिकारको संरक्षण, प्रबर्धन र सहभागितालाई सुनिश्चित गर्दै नगरपालिकालाई बालमैत्री स्थानीय शासनयुक्त पालिका घोषणा गर्न लागिएको उपप्रमुख बाल कुमारी कार्कीले बताउनुभयो । नगरपालिकाका ९ वटै वडा यहि जेठ २७ गते नै बालमैत्री वडा घोषणा भइसकेका छन्।
वडास्तरमा शिक्षा, स्वास्थ्य, बाल संरक्षण, बाल सहभागिता, खानेपानी, पूर्वाधार,लगायतका ५१ वटा सूचकहरू पुरा गरेपछि वडा स्तरीय घोषणा सम्पन्न गरिएको थियो। त्यसपछि जिल्ला समन्वय समितिले प्रत्येक वडामा अनुगमन गरी आवश्यक मापदण्डहरू पूरा भएको प्रतिवेदन तयार पारेको हो। बालमैत्री स्थानीय शासन घोषणाको प्रक्रिया अन्तर्गत तयार पारिएका प्रतिवेदनहरू बाग्मती प्रदेश सरकार समक्ष अनुमोदनको लागि पठाएपश्चात प्रदेश स्तरीय अनुगमन समितिले अनुगमन तथा मुल्यांकन र अन्तरक्रिया गरिसकेको छ ।
बाग्मती प्रदेशका मुख्य मन्त्री इन्द्र बहादुर बानियाँको प्रमुख आतिथ्यतामा घोषणा कार्यक्रम हुने नगरपालिकाका सूचना अधिकारी होम बहादुर थापाले जानकारी दिनुभयो । यो घोषणा पश्चात् नगरमा बालबालिकामैत्री नीति, योजना तथा संरचनाहरू थप प्रभावकारी रूपमा कार्यान्वयन गरिने अपेक्षा गरिएको छ । जिल्लाको मन्थली नगरपालिका बुधबार बालमैत्री स्थानीय शासनयुक्त पालिका घोषणा भैसकेको छ ।
