रामेछापको मन्थली नगरपालिका जिल्लाकै पहिलो बालमैत्री स्थानीय शासनयुक्त पालिका घोषणा भएको छ । बुधबार(आज) बागमती प्रदेशका सामाजिक विकास मन्त्री कञ्चनचन्द्र बादेले मन्थली नगरपालिकालाई बालमैत्री स्थानीय शासनयुक्त पालिका घोषणा गर्नुभयो ।
बालबालिकाको सर्वाङ्गीण विकासका लागि मन्थली नगरले विगत दुई वर्षदेखि विविध कार्यक्रम सञ्चालन गर्दै आएको छ। नगरभित्रका सबै १४ वटै वडा गत जेठ २८ गते नै बालमैत्री स्थानीय शासनयुक्त वडा घोषणा भइसकेका छन्।
२०७९ पुस १०–११ गते बसेको १२औँ नगरसभाले मन्थलीलाई बालमैत्री स्थानीय शासनयुक्त पालिका बनाउने निर्णय गरेको थियो। प्रतिवद्धताअनुसार २०८१ जेठ मसान्तभित्र घोषणा गर्ने योजना भए पनि कार्यान्वयन भने यस वर्ष जेठमा मात्र सम्पन्न भएको हो ।
यस घोषणाले बालबालिकाको हक र हितमा काम गर्दै उनिहरुको समग्र विकास र सुरक्षित वातावरण सुनिश्चित गर्न नगरपालिका प्रतिबद्ध रहेको नगर प्रमुख लब श्रेष्ठले बताउनुभयो । अब नगरपालिकाले बालबालिकाका लागि थप सुविधाहरू र कार्यक्रमहरू पनि सञ्चालन गर्ने उहाँको भनाई छ ।
जिल्लाकै रामेछाप नगरपालिका पनि यहि भदौ २१ गते शनिबार बालमैत्री स्थानीय शासनयुक्त पालिका घोषणाको तयारीमा जुटेको छ ।
