उद्योग तथा वाणिज्य कार्यालय मन्थली रामेछापको नेतृत्वमा विभिन्न सरोकारवाला निकायको संयुक्त टोलीले मन्थली बजार, सोमवारे हाट र लिखुतामाकोसी गाउँपालिका–५ धोवि बजारमा उद्योग तथा पसलहरुको अनुगमन गरेको छ । अनुगमनमा खाद्य प्रविधि तथा गुण नियन्त्रण डिभिजन कार्यालय सिन्धुली, खाद्य प्रविधि तथा गुण नियन्त्रण डिभिजन कार्यालय हेटौडा, नेपाल गुणस्तर तथा नापतौल विभाग जनकपुर, जिल्ला प्रशासन कार्यालय रामेछाप, मन्थली नगरपालिका, उद्योग वाणिज्य संघ, पत्रकार महासंघ, होटल व्यवसायी संघ र जिल्ला प्रशासन कार्यालयका प्रतिनिधिहरु सहभागी थिए ।
उद्योग, होटल–रेष्टुरेन्ट, खाद्य पसल, डेरी, बेकरी, मासु पसल, सुनचाँदी पसल, हार्डवेयर, कपडा पसललगायत क्षेत्रको गरिएको अनुगमनमा मन्थली बजारमा ५१, सोमवारे हाटमा राखिएको खुद्रा पसल ४ र लिखुतामाकोसी गाउँपालिका– ५ धोवि बजारमा १४ गरी जम्मा ६९ उद्योग तथा पसलको अनुगमन गरिएको हो ।
अनुगमनको क्रममा मन्थली बजारस्थित सुनापति वेकरी फुड प्रोडक्टलाई सरसफाइमा ध्यान नदिएको, व्यवस्थापन पक्ष कमजोर देखिएको र फर्म नवीकरण म्याद नाघेको कारण देखाउँदै प्रादेशिक व्यापार तथा व्यवसाय सम्बन्धी सम्बन्धी ऐन २०७६ को दफा ६० को खण्ड बमोजीम कसुर देखीएको भन्दै सोही ऐनको दफा ६१ को उपदफा १ खण्ड क,ख,ग,घ,ङ बमोजीम १० हजार रुपैयाँ जरिवाना गरिएको छ ।
अनुगमन निरीक्षण अधिकृत खेमराज घिमिरेका अनुसार सात दिनभित्र सुधार नगरे उद्योग नै बन्द गरिने चेतावनी दिइएको छ । त्यसैगरी, मन्थली– १ भैसेश्वरमा सञ्चालित अमृत दुग्ध डेरीलाई सरसफाइमा सुधार गर्नुपर्ने भन्दै १ हजार रुपैयाँ जरिवाना गरिएको छ । शैलुङ स्प्रिङ वाटर उद्योग, मन्थली डिलक्स एग्रो फरेष्ट प्रा.लि., रामेछाप डेरी उद्योग, चिरन्जीवी डेरी उद्योग र राजकुमार वेकरी उद्योग लगायत सुनचाँदी पसल, हार्डवयर पसल, कपडा पसल, चरपटे पानिपुरी पसलहरु लाई व्यवस्थापन सुधार गर्न निर्देशन दिइएको अनुगमन टोलीले जनाएको छ ।
यस्तै, अनुगमन टोलीले धोवि बजारमा सञ्चालनमा रहेका १४ उद्योग तथा पसलमध्ये केहीमा गम्भीर कैफियत भेटिएको जनाएको छ । तारा बुढाथोकीद्वारा सञ्चालित बुढाथोकी किराना स्टोरलाई लेबल नभएको समान बिक्री गरेको, म्याद नाघेको खाद्यन्न राखेको र खाद्यन्नमा किरा मार्ने विषादी राखिएको भेटिएपछि १० हजार रुपैयाँ जरिवाना गरिएको छ । त्यसैगरी, सानु किराना स्टोरलाई लेबल नभएको समान बिक्री गरेको कारण २ हजार रुपैयाँ जरिवाना गरिएको छ । साथै, त्यहाँबाट बरामद गरिएको मसेउरा एक बोरा र जाँड पकाउन प्रयोग हुने कनिका दुई बोरा जफत गरी तत्काल नष्ट गरिएको हो ।
आरके खाद्यन्न स्टोर्सलाई नापतौल ढकमा त्रुटि भेटिएपछि २ हजार रुपैयाँ जरिवाना गरिएको छ । साथै, एक केजिको ढक जफत समेत गरिएको छ । सो स्टोरलाई सात दिनभित्र अनिवार्य रूपमा साइनबोर्ड राख्नुपर्ने, खाद्य तथा अखाद्य वस्तु छुट्याएर राख्नुपर्ने, प्रमाणित नापतौल प्रयोग गर्नुपर्ने र डिजिटल तराजु राख्नुपर्ने निर्देशन दिइएको छ ।
अनुगमन टोलीले मन्जु भोजनालय एण्ड लजमा म्याद नाघेका चिउरा र चियापति जफत गरी करिब १ हजार रुपैयाँ बराबरको सामान तत्काल नष्ट गरेको छ । त्यस्तै, कल्पना खाद्यन्न स्टोरमा दालमट, चिउरा, बिस्कुटसहित ३ हजार ८३० रुपैयाँ बराबरको म्याद नाघेको सामान बरामद गरी नष्ट गरिएको छ ।
अनुगमन निरीक्षण अधिकृत घिमिरेका अनुसार खाद्य, डेरी, किराना पसल, होटल तथा अन्य उद्योग÷व्यवसायमा गुणस्तर कायम राख्नका लागि अनुगमनलाई अझ कडाइका साथ अगाडि बढाइने भएको छ । “सुधार नगरे दोहोरिएको अवस्थामा उद्योग वा पसल नै बन्द गर्ने कारबाहीसम्म गरिनेछ,” उहाँले बताउनुभयो । रामेछापमा हालसालै गरिएको यो संयुक्त अनुगमनलाई स्थानीय तह, उद्योगी–व्यवसायी र उपभोक्तासमेतले सराहना गरेका छन् ।
