रामेछापको ८ स्थानिय तहहरुमध्ये स्थानीय तह स्वमूल्यांकन(लिजा) मा गोकुलगंगा गाउँपालिका पहिलो भएको छ । संघीय मामिला तथा सामान्य प्रशासन मन्त्रालयले शुक्रवार सार्वजनिक गरेको आर्थिक वर्ष २०८०/०८१ को स्थानीय तह संस्थागत क्षमता स्वमूल्यांकनमा गोकुलगंगा गाउँपालिका ८२ अंक प्राप्त गर्दै प्रथम भएको हो ।
आर्थिक वर्ष २०७९/०८० को स्वमूल्यांकनमा गोकुलगंगा गाउँपालिकाले ४६ अंक मात्रै पाएको थियो । उक्त अंक सुधार गर्दै यो वर्ष जिल्लाका सबै स्थानीय तहलाई पछि पार्दै प्रथम भएको हो ।
त्यस्तै मन्थली नगरपालिकाले ८१.२५ अंक प्राप्त गरेको छ । मन्थली नगरपालिका दोस्रो भएको छ । यो वर्ष दोस्रो भएको मन्थली नगरपालिकाको अघिल्लो वर्ष अर्थात् २०७९/०८० मा ७४.५० अंक मात्रै पाएको थियो । अघिल्लो वर्षको तुलनामा मन्थलीले यो वर्ष पनि आफ्नो अंकमा सुधार गरेको छ ।
स्वमूल्यांकनमा सुनापति गाउँपालिका ७९.५० अंक प्राप्त गरेको छ । उक्त अंक अनुसार सुनापति गाउँपालिका अन्य स्थानीयत तहको तुलनामा तेस्रो भएको छ । आर्थिक वर्ष २०७९/०८० मा ७४.२५ अंक प्राप्त गरेको सुनापतिले यो वर्ष स्वमूल्यांकनमा आफूले पाउने अंकमा सुधार गरेको हो ।
रामेछाप नगरपालिकाले ६६.५० अंक प्राप्त गरेको छ । रामेछाप नगरपालिका चौथो भएको छ । अघिल्लो आर्थिक वर्ष अर्थात् २०७९/०८० मा ७१.५० अंक पाएको रामेछाप नगरपालिकाले यो वर्ष अर्थात् आर्थिक वर्ष २०८०/०८१ मा ६६.५० अंक मात्रै पाएको छ । अघिल्लो वर्षको तुलनामा रामेछाप नगरपालिकाले यो वर्ष कम अंक पाएको छ ।
उमाकुण्ड गाउँपालिकाले पनि आर्थिक वर्ष २०७९/०८० मा पाएको अंक भन्दा कम अंक पाएको छ । आर्थिक वर्ष २०७९/०८० मा पाएको अंक ७० अंक पाएको उमाकुण्डले आर्थिक वर्ष वर्ष २०८०/०८१ मा ६३ अंक मात्रै पाएको छ । यो वर्ष पाएको अंकलाई अन्य स्थानीय तहसँग तुलना गर्दा उमाकुण्ड गाउँपालिका पाँचौँ स्थानमा पुगेको छ ।
जिल्लाको खाँडादेवी गाउँपालिकाले ६२.७५ अंक पाएको छ । खाँडादेवीको अघिल्लो वर्ष अर्थात् आर्थिक वर्ष २०७९/०८० मा पाएको अंक भन्दा यो वर्ष वृद्धि भएको छ । अन्य स्थानीय तहसँग तुलना गर्दा खाँडादेवी गाउँपालिका छैठौँ स्थानमा देखिएको छ ।
जिल्लाको अर्को गाउँपालिका लिखुतामाकोशीले ५६ अंक प्राप्त गरेको छ । अघिल्लो वर्षको तुलनामा लिखुतामाकोशीले आफूले पाएको अंकमा सुधार गर्न सफल भएको छ । अघिल्लो वर्ष अर्थात् आर्थिक वर्ष २०७९/०८० मा लिखुतामाकोशी गाउँपालिकाले ४७.७५ अंक मात्रै पाएको थियो । ८ स्थानीय तहसँग तुलना गर्दा लिखुतामाकोशी गाउँपालिका सातौ स्थानमा रहेको छ ।
आर्थिक वर्ष २०७९/०८० मा ६१.२५ अंक पाएको दोरम्बा शैलुङ्ग गाउँपालिकाको यो वर्ष अर्थात् आर्थिक वर्ष २०८०/०८१ नतिजामा मन्त्रालयले सार्वजनिक गरेको तथ्याङ्कमा गाउँपालिकाको नाम नै समावेश गरिएको छैन ।
