रामेछापमा दुर्घटना न्यूनीकरणका लागि सवारी साधनहरुको यान्त्रिक परीक्षण गरिएको छ । शुक्रबार बिहान ९ बजे देखी १०ः३० बजेसम्मको समयमा सेलेघाट,मन्थली, खिम्ति भएर चल्ने साना ठुला सवारी साधनहरुको यान्त्रिक परीक्षण गरिएको हो ।
जिल्ला ट्राफिक प्रहरी कार्यालय रामेछापका प्रमुख प्रहरी सहायक निरीक्षक सुभाष चन्द्र मण्डलको कमाण्डमा भएको यान्त्रिक परीक्षणमा ५० वटा सवारी साधनहरुको यान्त्रिक चेकजाचँ गरिएको हो ।
सवारी साधनहरुको विभिन्न यान्त्रिक उपकरण चेकजाचँसँगै वाइपर नचल्ने,लाइट नबल्ने सवारी साधनहरुलाई मर्मत गर्न आग्रह गरिएको जिल्ला ट्राफिक प्रहरी कार्यालयले जानकारी दिएको छ । कार्यालय प्रमुख मण्डलले यान्त्रिक उपकरण ठिक नभए दुर्घट्ना निम्तन सक्ने भन्दै चालक तथा सहचालकलाई सम्झाई बुझाइ गर्नुभयो ।
साथै शुक्रबार अस्थाई ट्राफिक प्रहरी पोष्ट खिम्ति र सेलेघाटमा सवारी साधनहरुको चालक तथा यात्रुहरुलाई दुर्घट्ना न्युनिकरण गर्ने उदेश्यले ट्राफिक नियम सम्बन्धी पर्चा पम्प्लेट वितरण तथा ट्राफिक नियम सम्बन्धी सचेतनामुलक कक्षा संचालन गरिएको थियो ।
