आँखाका बिरामीहरुको सहजताका लागी अहिले रामेछापका पालिकाहरुमा रहेका अस्पतालहरुमा एकीकृत आँखा इकाई सञ्चालन भैरहेको छ । तिलगंगा आँखा प्रतिष्ठानले आफ्नो कार्यक्षेत्रका जिल्लामा प्राथमिक अस्पतालमार्फत आँखा सेवा विस्तार गर्ने नीति अनुसार जिल्लाको सुनापति र उमाकुण्ड गाउँपालिकामा पनि एकीकृत आँखा इकाई सञ्चालन गर्न सम्झौता गरेको हो ।
यसका लागि तिलगंगा आँखा प्रतिष्ठान, तिलगंगा जिल्ला सर्जिकल आँखा केन्द्र, रामेछाप ,सुनापति र उमाकुण्ड गाउँपालिकाबिच संयुक्त रूपमा सम्झौता पत्रमा हस्ताक्षर तथा आदान–प्रदान गरिएको हो। सम्झौता अनुसार पालिकाको प्राथमिक अस्पतालमा आधुनिक उपकरणसहितको आँखा एकाइ स्थापना भई स्थानीयवासीले आधारभूतदेखि सेवा प्राप्त गर्ने सुविधा पाउनेछन्।
तिलगंगा आँखा प्रतिष्ठानका अनुसार यस एकीकृत आँखा एकाइ सञ्चालन भएपछि ग्रामीण भेगका नागरिकलाई आँखा उपचारका लागि अन्य सहर धाउनुपर्ने आवश्यकता कम हुनेछ। साथै, नियमित आँखा स्वास्थ्य परीक्षण, औषधि वितरण, चस्मा सेवा र आवश्यक परे सर्जिकल सेवा पनि सो अस्पतालमै उपलब्ध हुनेछ। गाउँघरका नागरीकले पछिल्लो समय पालिकाका अस्पतालबाटै आँखा परीक्षण तथा उपचार सेवा पाउँदै आएका छन ।
