रामेछाप र ओखलढुंगाका नागरीकले बिरामी हुँदा प्रयोग गर्दै आएको एम्बुलेन्स अहिले बिग्रिएर बसेको वर्षौँ भयो । रामेछाप नगरपालिका वडा नं ३ साँघुटारका लागी सांसद पूर्ण बहादुर तामाङ्ग(कान्छाराम) ले २०७५ सालमा दिएको एम्बुलेन्स अहिले आफै बिरामी भएर बसेको हो ।
२०७९ साल माघदेखी साँघुटार बजारमा बिग्रिएर थलिएको एम्बुलेन्स अहिले पनि थलामै छ । गोठगाउँ,हिमगंगा,साँघुटार सहित ओखलढुंगाको लिखु गाउँपालिकाका नागरीकले समेत सेवा लिँदै आएको एम्बुलेन्स अहिले थलिएको हो ।
अहिले यो क्षेत्रमा एम्बुलेन्स सेवा अभावका कारण बिरामीहरूले समयमै उपचार पाउन नसक्दा समस्या झेल्नु परेको छ। विशेष गरी आकस्मिक अवस्था र सुत्केरी महिलाका लागि एम्बुलेन्स नहुँदा जीवनमरणको जोखिमसमेत बढेको स्थानीयवासीले गुनासो गरेका छन्।
साँघुटारका स्थानिय सुमन प्रधानका अनुसार एम्बुलेन्स अभावको कारण सुत्केरी, जटिल रोगी तथा घाइतेहरू समयमै अस्पताल पुग्न समस्या हुने गरेको छ । समयमै अस्पताल नपुग्दा कतिपय बिरामीले ज्यान गुमाउनु परेको छ ।
सो क्षेत्रका कोही बिरामी परिहाले सुमो,बोलेरो,बस लगायतका सवारी साधन रिजर्ब गरेर अस्पताल पुयाउनुपर्ने बाध्यता रहेको वडा नं ३ का वडाअध्यक्ष दल बहादुर प्रधानले बताउनुभयो ।
बिग्रिएर बसेको एम्बुलेन्स मर्मत गर्न धेरै खर्च लाग्ने भएका कारण मर्मत गरेर संचालन गर्न नसकिएको उहाँले बताउनुभयो । भौगोलिक रुपमा विकट रहेको साँघुटारका लागी एम्बुलेन्स अपरिहार्य रहेको उहाँले बताउनुभयो । विभिन्न दातृ निकायबाट सहयोगको अपेक्षा गरिएको उहाँको भनाई छ ।
