यो वर्ष रामेछाप जिल्लामा ९५ प्रतिशत खेतमा धान रोपाइँ सम्पन्न भएको छ । साउन महिनाको २५ गतेसम्म जिल्लामा ९५ प्रतिशत खेतमा धान रोपाइँ सम्पन्न भएको कृषि विकास कार्यालय रामेछापका सूचना अधिकारी उपेन्द्र चौधरी कुर्मीले बताउनुभयो ।
उहाँका अनुसार जिल्लाको सिँचाई हुने र पर्याप्त पानी भएको क्षेत्रमा यो वर्ष राम्रोसँग रोपाइँ भएको हो । अझै ५ प्रतिशत खेतमा धान रोपाइँ हुन बाँकी रहेको छ । यो साउन महिनाभरीमा रोपाइँ हुन बाँकी ५ प्रतिशत खेतमा पनि रोपाइँ भैसक्ने अपेक्षा गरिएको सूचना अधिकारी कुर्मीले बताउनुभयो ।
रामेछाप जिल्लाभर ७ हजार ८ सय ५९ हेक्टर खेतमा धान रोपाइँ हुँदै आएको छ । जिल्लाका अधिकांश ठाउँहरुमा आकाशे पानीको भरमा धान रापाइँ हुँदै आएको छ । पर्याप्त पानी नपरेका कारणले पनि रोपाइँ ढिलो भएको हो । धान खेती गर्दै आएका किसानहरुले सिँचाईको समस्या,रासायनिक मलको अभाव,रोग किराको प्रकोपको जस्ता विविध समस्या भोग्दै आएको गुनासो गरेका छन ।
