रामेछापको पुरानो सदरमुकाम समेत रहेको रामेछाप नगरपालिकाको केन्द्र रामेछाप बजार कुरुप बन्दै गएको छ । सेलेघाट–रामेछाप–साँघुटार सडकको काम निर्माण व्यवसायीले अलपत्र पारेपछि रामेछाप बजार कुरुप देखिएको हो । बजारको बिचैबिच भएर निर्माण हुने यो सडकको काम समयमै सम्पन्न नहुँदा बजार नै कुरुप देखिएको हो ।
रामेछापको मन्थली नगरपालिका–६ सेलेघाटदेखि रामेछाप बजार हुँदै साँघुटारसम्म गरी करिब ५० किलोमिटर दुरीमा रहेको निर्माणाधीन सेलेघाट–रामेछाप–साँघुटार सडकको काम अहिले अलपत्र छ । बजार क्षेत्रमा भत्किने घरहरुकोे मुआब्जा वितरण भैसकेको छ । केही कच्ची र पुराना घरहरु भत्काइसकेको भएपनि पक्कि घरहरु भत्काउनै बाँकी रहेको छ ।
बजार क्षेत्रको मुख्य सडकको अवस्था दयनिय बनेको हो । सडकको दुरावस्था भएपछि स्थानीयले सडक छिटो मर्मत र स्तरोन्नति गर्न आग्रह गरेका छन । स्थानिय सरकार रामेछाप नगरपालिकाले पनि बारम्बार रामेछाप बजार क्षेत्रको सडक निर्माण सकेर अन्यत्र सुरु गर्न आग्रह गरेको भएपनि निर्माण कम्पनीले बेवास्ता गर्दै आएको छ ।
रामेछाप नगरपालिका प्रमख लबश्री न्यौपानेले नगरपालिका आफैले बजार क्षेत्रको सडक कालोपत्रे गर्न सक्ने भएपनि योजनामा दोहोरोपना देखिने बताउनुभयो । एउटै सडकमा दुईवटा निकायबाट बजेट विनियोज गरेर काम गर्दा भ्रष्टाचार गरेको ठहरिने भएका कारण पनि नगरपालिकाले चाहेर पनि यो काम आफैले गर्न नसकेको बताउनुभयो ।
नगरपालिकाले सडक निर्माणको काम छिटो सक्न बारम्बार निर्माण कम्पनीलाई आग्रह गर्दै आएको भएपनि निर्माण कम्पनीले कुनै चासो नदेखाएको उहाँको भनाई छ । “हामीले भारतीय निर्माण कम्पनी टेलिकम्युनिकेसन इन्डिया लिमिटेड(टीसीआईएल)का प्रतिनिधीसँग दर्जनौँ पटक छलफलमा बसेर लिखित तथा मौखिम निर्देशन दियौँ तर टेर्दैन,” उहाँले भन्नुभयो ।
भारतीय एक्जिम बैङ्क मार्फत बन्ने सो सडक निर्माणको जिम्मा भारतीय निर्माण कम्पनी टेलिकम्युनिकेसन इन्डिया लिमिटेड (टीसीआईएल)ले पाएको छ । सो कम्पनीले नेपाली निर्माण व्यवसायीलाई काम जिम्मा दिएको छ ।
सन् २०२० को नोभेम्बर ११ मा सुरु भएको आयोजना २०२३ को मे १० भित्र कूल १ अर्ब ९४ करोड ७१ लाख रुपैयाँमा सक्नुपर्ने गरी सम्झौता भएको थियो । निर्धारित समयमा काम सम्पन्न नभएपछि निर्माण कम्पनीले बारम्बार म्याद थप्दै लगेको छ ।
रामेछापको सालु, देउराली, साँघुटार,ओखलढुंगाको लिखु, घोराखोरी लगायतका क्षेत्रमा जाने यातायात साधन यही सडक भएर चल्दछन् । बाटो हिलो र चिप्लो भएको कारण सालुदेखि साँघुटारसम्म यातायात साधनहरू घण्टौँ फस्ने र फसेका गाडी यात्रुहरूले डोरी लगाएर तान्ने गरेका छन । अरु समयमा भन्दा वर्षातको समयमा यो सडक भएर यात्रा गर्दा निकै सास्ती खेप्नु परेको यात्रीहरुले गुनासो गरेका छन ।
