रामेछापको रामेछाप नगरपालिका वडा नं ४ का किसान पछिल्लो समय बाख्रा पालनतर्फ आकर्षित हुँदै गएका छन्। परम्परागत रूपमा अन्न उत्पादनमै केन्द्रित किसान व्यावसायिक बाख्रा पालनतर्फ आकर्षित भएका हुन । समुदायमा आधारित एक वडा एक कृषि उत्पादन कार्यक्रम अन्तर्गत बाख्रा पालन कार्यक्रम संचालन भएपछि अहिले किसान बाख्रा पालनतर्फ आकर्षित भएका हुन ।
अहिले हिमगंगामा पशु सेवा कार्यालय सिन्धुली,रामेछाप नगरपालिका र स्थानिय सहकारीको लागत साझेदारीमा बाख्रा पालन कार्यक्रम संचालन भैरहेको छ । स्थानिय थानीगैया कृषि सहकारी संस्थामा सदस्य बनेपछि उनिहरुलाई बाख्रा पालन कार्यक्रममा आबद्ध गराईदै आएको सहकारीका कोषाध्यक्ष लोक बहादुर मगरले बताउनुभयो ।
सुधारिएको खोर निर्माण गरि बाख्रा पालनका लागी घाँसको बिरुवा,घाँस टुक्राउने मेसिने लगायतका उकरणहरु किसानले लागत साझेदारीमा प्राप्त गरेका छन । बाख्रा पालन कार्यक्रममा हालसम्म भएको खर्च तथा प्रगति विवरण मंगलबार सार्वजनिक गरिएको छ । वडा नं ४ को कार्यालयमा किसान सहित सरोकारवालाहरुको उपस्थितीमा उक्त कार्यक्रमको सार्वजनिक सुनुवाई कार्यक्रमको गरिएको हो ।
बरिष्ठ पशु विकास अधिकृत एवं पशु सेवा कार्यालय सिन्धुलीका प्रमुख डा.ध्रुब डि.सी ले हालसम्म भएको खर्च तथा प्रगति विवरण प्रस्तुत गर्नुभयो । उहाँका अनुसार कार्यक्रम सुरुभएदेखी हालसम्म ६५ लाखभन्दा बढी रकम खर्च भैसकेको छ । रामेछाप नगरपालिकाको २० प्रतिशत,पशुसेवा कार्यालयको ६० प्रतिशत र स्थानिय कृषकको २० प्रतिशत लागत साझेदारीमा कार्यक्रम संचालन भएको हो । यो कार्यक्रमबाट ३६ जना कृषक लाभान्वित भएका हुन ।
रामेछाप नगरपालिका ४ का वडाअध्यक्ष कृपा थापा मगरले वडालाई बाख्रा पकेट क्षेत्रको रुपमा विस्तार गर्न लागि परेको बताउनुभयो । बाख्रा पालन गर्न चाहने वडाका सबै नागरीकलाई यो कार्यक्रममा समेटिने उहाँले बताउनुभयो । अहिले व्यवस्थित रुपमा बाख्रा पालन गर्न धेरै कृषकहरुले इच्छा व्यक्त गरेको उहाँले बताउनुभयो । हिमगंगाका किसानले बाख्रा पालनको लागी आवश्यक सबै सामाग्रीहरु सहित प्राविधिक सहयोग पाएको भन्दै खुशी व्यक्त गरेका छन ।
