रामेछापको रामेछाप नगरपालिकामा राष्ट्रिय परिचय पत्रको विवरण सङ्कलन गर्ने अभियान सुरु भएको छ । जेष्ठ नागरीकहरुलाई लक्षित गरी राष्ट्रिय परिचय पत्रको विवरण सङ्कलन वडाबाटै सुरु गरिएको हो । वडा नं ७ बाट मंगलबार(आज) देखी विवरण सङ्कलन तथा कार्ड वितरण सुरु भएको हो ।
२०७७ साउन १ गतेदेखी २०८० साल भाद्रसम्म जिल्ला प्रशासन कार्यालयमा उपस्थित भएर विवरण दर्ता गराउनुभएकाहरुको राष्ट्रिय परिचय पत्र कार्ड वितरण हुने रामेछाप नगरपालिकाले जनाएको छ । रामेछाप नगरपालिकाका प्रवक्ता एवं वडा नं ७ का वडाअध्यक्ष समिर कार्कीका अनुसार जेष्ठ नागरीक तथा अपाङ्गता भएकाहरुको सहजताको लागी वडास्तरीय घुम्ती शिविर आयोजना गरी विवरण लिने काम सुरु गरिएको हो । वडा नं ७ ले अशक्तहरुलाई वडाकै एम्बुलेन्स मार्फत विवरण दर्ताका लागी घरदेखी ल्याउने र पुर्याउने व्यवस्था गरेको वडाअध्यक्ष कार्कीले बताउनुभयो ।
योसँगै वृद्धवृद्धा तथा अपाङ्गता भएकाहरु राष्ट्रिय परिचयपत्र बनाउनका लागि जिल्ला प्रशासनमा गएर लाइनमा बस्नुपर्ने बाध्यताको अन्त्य भएको छ । राष्ट्रिय परिचयपत्र विवरण सङ्कलनका लागि आवश्यक उपकरण र जनशक्ति जिल्ला प्रशासन कार्यालय रामेछापले व्यवस्थापन गरेको छ ।
रामेछापका प्रमुख जिल्ला अधिकारी श्याम कृष्ण थापाले सम्बन्धित वडाहरुमै गएर सेवा दिँदा प्रशासन कार्यालयमा सेवाग्राहिको चाप पनि घट्ने र नागरीकले घरदैलोमा सहज रुपमा सेवा पाउने बताउनुभयो । यहि कुराहरुलाई मध्येनजरगरी सम्बन्धित पालिकासँगको सहकार्यमा वडामै पुगेर विवरण सङ्कलन तथा कार्ड वितरण भैरहेको पनि उहाँले बताउनुभयो ।
नगरपालिकाको ९ वटै वडाहरुमा राष्ट्रिय परिचय पत्रको विवरण सङ्कलन तथा कार्ड वितरण हुनेछ । वडा नं ६ मा यहि साउन २२ र २३ गते,वडा नं ५ मा २४ र २५ गते,वडा नं ४ मा साउन २६ गतेदेखी २८ गतेसम्म विवरण सङ्कलन तथा कार्ड वितरण हुनेछ ।
यसैगरी वडा नं ३ मा साउन २९ र ३० गते,वडा नं १ मा साउन ३१ र भदौ १ गते,वडा नं २ मा भदौ २ र ३ गते ,वडा नं ९ मा भदौ ४ र ५ गते र वडा नं ८ मा भदौ ६ देखी ८ गतेसम्म विवरण सङ्कलन तथा कार्ड वितरण हुने रामेछाप नगरपालिकाले जानकारी दिएको छ ।
