रामेछापको रामेछाप नगरपालिकामा दुई दिने “एकीकृत प्रारम्भिक बाल विकास योजना तर्जुमा कार्यशाला” सम्पन्न भएको छ । साउन १८ र १९ गते २ दिन चलेको कार्यशाला रामेछाप नगरपालिकाको अयोजना तथा चाइल्ड नेटवर्क फाउण्डेशन र सेतो गुराँस राष्ट्रिय बाल विकास सेवाको सहकार्य तथा सहजीकरणमा भएको हो ।
“गर्दै गरौ लगानी बाटो, कुलो, पुल, भवन र मन्दीरमा, थप गरौ लगानी प्रारम्भिक बालविकासमा ” र “प्रारम्भिक विकासमा लगानी, दिगो राष्ट्र विकासको थालनी ” भन्ने दुई मूल नारा सहित कार्यशालाको आयोजना गरिएको हो । स्थानीय तहका सरोकारवालाहरूलाई एकीकृत प्रारम्भिक बाल विकासको अवधारणाबारे जानकारी दिने, बाल्यकालको सर्वाङगीण विकास सुनिश्चित गर्न आवश्यक योजना निर्माणमा स्थानीय तहको भूमिका प्रस्ट पार्ने, तथा आगामी आर्थिक वर्षको वार्षिक र आवधिक योजनामा बाल विकास क्षेत्रमा लगानी बढाउन प्रेरित गर्ने उद्देश्यले कार्यशाला आयोजना गरिएको हो।
नेपाल सरकार, सङ्घीय मामिला तथा सामान्य प्रशासन मन्त्रालय, अन्य सम्बन्धित मन्त्रालयहरु, यूनिसेफ नेपाल र सेतो गुराँस राष्ट्रिय बाल विकास सेवाको प्राविधिक सहयोगमा निर्मित स्थानीय तहमा एकीकृत प्रारम्भिक बाल विकास योजना तर्जुमा कार्यशाला स्रोत सामग्री २०७५ को आधारमा सम्पन्न भयो । उक्त कार्यशाला सेतो गुराँस राष्ट्रिय बाल विकास सेवाका कार्यक्रम संयोजक कर्ण दराइ सहितको टिमले कार्यशालालाई सहजीकरण गर्नुभएको रामेछाप नगरपालिकाको बाल विकास संयोजक सरोज श्रेष्ठले जानकारी दिनुभयो ।
कार्यशालाको क्रममा रामेछाप नगरपालिकामा ११ सदस्यीय प्रारम्भिक बाल विकास समिति नगरप्रमुख लवश्री न्यौपानेको अध्यक्षतामा गठन गर्ने निर्णय गरिएको छ । यस समितिले शिक्षा, स्वास्थ्य, पोषण, सरसफाइ, कृषि र पशुपालन जस्ता क्षेत्रलाई एकीकृत गर्दै प्रारम्भिक बाल विकास कार्यक्रममा प्राविधिक सहयोग तथा अनुगमन गर्नेछ । कार्यशालाबाट आगामी आर्थिक वर्ष २०८२/२०८३ का लागि एकिकृत प्रारम्भिक बाल विकास योजना तयार गरिएको छ । यो कार्यक्रम गर्न स्थानीय सरकार र सहकार्य संस्थाले प्रतिबद्धता व्यक्त गरेका छन् ।
कार्यशालामा सहभागी ४५ जनाले हस्ताक्षर गरी “गर्भावस्था देखि ८ वर्षसम्मका सबै बालबालिकाको सर्वोत्तम हित र सर्वाङ्गिन विकासको अधिकार सुनिश्चित गर्न स्थानीय सरकार, सेवा प्रदायक संस्था, विद्यालय, अभिभावक, शिक्षा, स्वास्थ्य, सञ्चार र नागरिक समाज समन्वयमा सक्रिय भूमिका निर्वाह गर्ने“ प्रतिबद्धता जनाएका छन् ।
नगरपालिका उप प्रमुख बालकुमारी थापा कार्कीको अध्यक्षतामा सम्पन्न उक्त कार्यशालामा ९ वटै वडाका वडा अध्यक्षहरू, वडा सचिवहरू, निमित प्रशासकीय अधिकृत,शिक्षा अधिकृत, पशु तथा कृषि शाखा प्रमुख, बालविकास संयोजक, गैरसरकारी संस्था हिमालयन नविन समाज,सेतो गुराँसका सेवाका कर्मचारीहरु,बालमित्र सहजकर्ता, स्थानीय विद्यालयका प्रधानाध्यापक,बाल क्लब प्रतिनिधि लगायत सरोकारवाला संस्थाका विशिष्ट व्यक्तिहरुको उपस्थिती रहेको थियो । कार्यशाला स्थानीय तहमा प्रारम्भिक बाल विकासको विषयलाई नीतिगत रूपमा स्थापित गर्न महत्वपूर्ण कदमको रूपमा हेरिएको बताइएको छ ।
