रामेछापमा सवारी दुर्घटनामा परी १ वर्षमा १२ जनाले ज्यान गुमाएका छन । दुर्घटनामा १ सय २१ जना घाईते भएका छन । गत आर्थिक वर्ष २०८१/८२ को साउनदेखी असार मसान्तसम्मको अवधिमा भएको ४८ वटा सवारी दुर्घटनामा परी १२ जनाले ज्यान गुमाएका हुन । जिल्ला ट्राफिक प्रहरी कार्यालय रामेछापका अनुसार दुर्घटनामा ६ जना पुरुष,३ जना महिला र ३ जना बालिकाले ज्यान गुमाएका हुन । दुर्घटनामा १ सय ६ जना सामान्य र १५ जना गम्भिर घाईते भएका हुन ।
रामेछापमा सबैभन्दा धेरै मोटरसाईकल दुर्घटना :
रामेछापमा सबैभन्दा धेरै मोटरसाईकल दुर्घटना भएको छ । २४ वटा मोटरसाईकल दुर्घटना हुँदा जिपकार ९ वटा,ट्रक ५ वटा,बस ४ वटा,ट्याक्टर २ वटा र अन्य ४ वटा सवारी साधन दुर्घटनामा परेको हो । ट्राफिक प्रहरी कार्यालय रामेछापले उपलब्ध गराएको तथ्याङ्गक अनुसार मंसिर महिनामा भएको सवारी दुर्घटनामा ६ जनाले ज्यान गुमाएका हुन । असोज महिनामा भएको सवारी दुर्घटनामा ३ जना र चैत्र महिनामा भएको सवारी दुर्घटनामा २ जनाले ज्यान गुमाएका हुन ।
वितेको ३ आर्थिक वर्षको तथ्याङ्गकलाई हेरौँ :
वितेको ३ आर्थिक वर्षको तथ्याङ्गकलाई हेर्ने हो भने आ.व. २०७८/७९ मा ४२ वटा सवारी दुर्घटनामा परी २२ जनाले ज्यान गुमाएका हुन । आ.व. २०७९/८० मा ३५ वटा सवारी दुर्घटनामा परी १३ जनाले ज्यान गुमाएका हुन । आ.व. २०८०/८१ मा ४५ वटा सवारी दुर्घटनामा परी ९ जनाले ज्यान गुमाएका हुन । जिल्लामा सवारी दुर्घटनाको संख्यामा कमी आउन सकेको छैन । सवारी दुर्घटनामा ज्यान गुमाउने र घाईते हुनेहरुको संख्या बढीरहेको छ ।
यि हुन दुर्घटनाका मुख्य कारणहरु :
दुर्घटनाको मुख्य कारणहरुमा सिट संख्या भन्दा बढि यात्रु राख्नु,हेल्मेट नलगाउनु, लागू पदार्थ सेवन (लापसे ) गरी सवारी चलाउने,सवारी चालक अनुमति पत्र नभएकाहरुले सवारी चलाउनु,खराब सडक अवस्था लगायत रहेको जिल्ला ट्राफिक प्रहरी कार्यालय रामेछापले जनाएको छ । दुर्घटना न्युनिकरणको लागि ट्राफिक प्रहरी कार्यालय रामेछापले विभिन्न सचेतनामूलक कार्यक्रमहरु संचालन गर्दै आएको छ । जिल्लामा सवारी चेकजाँच,लापसे सेवन गरे नगरेको परीक्षण,सवारी चालकको स्वास्थ्य परीक्षण लगायतका कामहरु ट्राफिक प्रहरीले गर्दै आएको छ ।
