रामेछापको गोकुलगंगा गाउँपालिकाले १७ औँ गाउँसभा तथा अधिवेशनको अवसरमा कक्षा ५ र ८ मा उत्कृष्ट नतिजा ल्याउने विद्यार्थीहरूलाई दोसल्ला ओढाएर, कदरपत्र र नगद सहित सम्मान गरेको छ ।
उत्कृष्ट नतिजा ल्याएका विद्यार्थीहरूलाई प्रोत्साहन स्वरूप सम्मान गर्नुका साथै उनिहरुलाई मार्गदर्शन गर्ने शिक्षकहरूलाई समेत कदर पत्र सहित सम्मान गरिएको हो । पालिका स्तरको परीक्षामा उत्कृष्ट नतिजा दिन सफल भएका विद्यालयका विषयगत शिक्षकहरूलाई पनि दोसल्ला र प्रमाणपत्रसहित सम्मान गरिएको हो ।
सम्मान कार्यक्रममा गाउँपालिका अध्यक्ष काजी बहादुर खड्का (दिनेश) ले विद्यार्थी र शिक्षकहरूलाई बधाई दिँदै आगामी दिनमा अझ उत्कृष्ट परिणाम ल्याउने गरि लाग्न आग्रह गर्नुभयो । यसप्रकारको सम्मानले विद्यार्थी र शिक्षक दुवैलाई हौसला प्रदान गर्ने र शैक्षिक गुणस्तरमा सकारात्मक परिवर्तन ल्याउने उहाँले विश्वास व्यक्त गर्नुभयो ।
