रामेछापको सदरमुकाम समेत रहेको मन्थली नगरपालिकाको १४ वटै वडा यहि जेठ २८ गते बालमैत्री घोषणा हुँदैछ । सबै वडाहरुको सूचक पुरा भएर जिल्ला समन्वय समितिबाट अनुगमन समेत भैसकेकाले सबै वडालाई एकैदिन बालमैत्री घोषणा गर्न लागिएको नगरपालिकाका महाशाखा प्रमुख एवं सूचना अधिकारी हेमन्त बुढाथोकीले जानकारी दिनुभयो ।
१४ वटै वडामा हुने कार्यक्रमको तयारी अन्तिम चरणमा पुगेको उहाँले बताउनुभयो । बालमैत्री स्थानीय शासन राष्ट्रिय रणनीतिमा व्यवस्था भएका ५१ सूचक पूरा गर्दै नगरपालिकाका १४ वटै वडा बालमैत्री वडा घोषणाका लागि जिल्ला समन्वय समितिले अनुगमन गरिसकेको छ ।
सबै वडाहरुले बालमैत्री घोषणाका लागि आवश्यक शिक्षा, स्वास्थ्य, खानेपानी र पूर्वाधारलगायतका सूचक पूरा गरेको हो । वडा घोषणा पश्चात बाग्मती प्रदेशमा सबै प्रतिवेदन पठाइने र उक्त प्रतिवेदन अनुमोदन भएपछि नगरपालिकालाई नै बालमैत्री घोषणा गरिने सूचना अधिकारी बुढाथोकीले बताउनुभयो । असार महिनासम्म नगरपालिकालाई नै बालमैत्री घोषणा गरिने उहाँको भनाई छ ।
