आगामी आर्थिक वर्ष २०८२/८३ को लागि रामेछाप जिल्लाले १ अर्ब ६६ करोड रुपैयाँ बजेट पाउने भएको छ । अर्थ मन्त्रालयले सार्वजनिक गरेको आगामी आर्थिक वर्षको स्थानीय तहलाई दिने राजश्व बाँडफाँट तथा वित्तीय समानीकरणको अनुमानित विवरण अनुसार रामेछाप जिल्लाले उक्त बजेट पाउने भएका हुन् ।
मन्त्रालयले सार्वजनिक गरेको विवरणअनुसार रामेछापका स्थानीय तहले १ अर्ब ६६ करोड ३५ लाख पाउने छन् । जिल्लाका ८ स्थानीय तहले राजश्व बाँडफाँट बापत ७३ करोड ५७ लाख र वित्तीय समानीकरणतर्फ ९२ करोड ७८ लाख रुपैयाँ पाउने छन् । आगामी आर्थिक वर्ष सङ्घीय सरकारबाट देशभरका स्थानीय तहमा १ खर्ब ६७ अर्ब पाँच करोड बजेट बाड्ने छ ।
आगामी आर्थिक वर्षका लागि नेपाल सरकारले उपलब्ध गराउने राजश्व बाँडफाँडको अनुमानित रकमअनुसार रामेछाप जिल्लामा मन्थली नगरपालिकाले सबैभन्दा बढी ११ करोड ५० लाख रुपैयाँ बजेट पाउने भएको छ भने सबैभन्दा कम सुनापति गाउँपालिकाले ७ करोड ११ लाख रुपैयाँ बजेट पाउने भएको छ ।
त्यसैगरी उमाकुण्ड गाउँपालिकाले १० करोड ९४ लाख, गोकुलगङ्गा गाउँपालिकाले ९ करोड १२ लाख, लिखु तामाकोशी गाउँपालिकाले ९ करोड १८ लाख, रामेछाप नगरपालिकाले १० करोड ५ लाख, खाँडादेवी गाउँपालिकाले ८ करोड ५३ लाख र दोरम्बा शैलुङ गाउँपालिकाले ८ करोड १४ लाख रुपैयाँ बजेट राजश्व बाँडफाँटतर्फ प्राप्त भएका छन् ।
राष्ट्रिय प्राकृतिक स्रोत तथा वित्त आयोगले निर्धारण गरेको सुत्रमा आधारित भइ मुलुकका ७५३ वटा स्थानीय तहमा राजश्व बाँडफाँटतर्फ ७८ अर्ब ८ करोड ५० लाख रुपैयाँ जाने अनुमान गरिएको छ ।
वित्तीय समानीकरणतर्फ पनि रामेछापका ८ स्थानीय तहमध्ये सबैभन्दा बढी मन्थली नगरपालिकाले १८ करोड ५२ लाख पाउने भएको छ भने सबैभन्दा कम सुनापति गाउँपालिकाले १० करोड ४७ लाख पाउने भएको छ ।
त्यसैगरी, उमाकुण्ड गाउँपालिकाले १२ करोड ५४ लाख, गोकुलगङ्गा गाउँपालिकाले ११ करोड ७३ लाख र लिखु तामाकोसी गाउँपालिकाले १२ करोड २८ लाख, रामेछाप नगरपालिकाले १४ करोड ६० लाख, खाँडादेवी गाउँपालिकाले १२ करोड ९० लाख र दोरम्बा शैलुङ गाउँपालिकाले ११ करोड ७४ लाख रुपैयाँ बजेट पाउने भएका छन् ।
