रामेछापको रामेछाप नगरपालिका वडा नं ८ भंगेरी धारापानीमा अटो दुर्घटना भएको छ । बुधबार(आज) बिहान करिब ९:२० बजेको समयमा सल्लेबाट मन्थली जाँदै गरेको अटो दुर्घटनामा परेको हो । प्रदेश २-०४ ००१ ह ००२० नम्बरको अटो सडकमा पल्टिएको हो । सडकभन्दा माथिल्लो पट्टी रहेको राम बहादुर शाहीको जग्गा खन्दै गरेको डोजरले पल्टाएको ढुंगाले लागेर अटो पल्टिएको प्रहरी चौकी रामेछाप डाँडाले जानकारी दिएको छ ।
उक्त दुर्घटनामा अटो चालक तिर्थ घिसिङ र उहाँको श्रीमती कृष्णमाया तामाङ घाइते हुनुभएको हो । घाइते तिर्थको अवस्था सामान्य रहेको छ भने कृष्णमायाको काठमाडौको एक अस्पतालमा उपचार भैरहेको प्रहरीले जानकारी दिएको छ । अटोमा ३ जना सवार थिए । एकजना भने सकुशल रहेको प्रहरीले जनाएको छ ।
