रामेछापको रामेछाप नगरपालिकाले शिक्षा क्षेत्र सुधारको लागी दस वर्षे शैक्षिक योजना निर्माण गर्ने भएको छ । नगरपालिकाले शिक्षालाई सर्वसुलभ, पहुँचयोग्य एवं गुणस्तरीय बनाउनका लागि योजना निर्माण गर्न लागेको नगरपालिकाका प्रमुख लबश्री न्यौपानेले बताउनुभयो ।
विगतको अवस्था, वर्तमानको यथार्थ र भविष्यको सपना बोध हुने गरी योजना निर्माण हुने उहाँले बताउनुभयो । नगरपालिकाले बनाउन लागेको योजनामा ज्ञान, सीप अनुभवलाई आत्मसात् गर्दै वर्तमानमा भविष्यको आशाका लागि काम गर्न सघाउने उद्देश्य राखिएको नगर प्रमुख न्यौपानेले बताउनुभयो ।
नगरपालिकाले बुधबार नगर शिक्षा योजना निर्माणको लागी प्रारम्भिक कार्यशाला तथा सुझाव संकलन कार्यक्रम गरेको छ । विभिन्न राजनितीक दलका प्रमुख एवं प्रतिनिधी,पत्रकार,विद्यालयका प्रधानाध्यापक,शिक्षक,विद्यालय व्यवस्थापन समितिका अध्यक्ष सहितका सरोकारवालाहरुसँग सुझाव संकलन गरिएको हो । सरोकारवालाहरुबाट आएको सुझावलाई प्राथमिकतामा राखेर योजना निर्माण हुने नगरपालिकाले जनाएको छ ।
आगामी दस वर्षको अवधिमा नगरपालिकाको शिक्षा विकासका लागि मार्गचित्र तय गर्न मिश्रित अवधारणामा केन्द्रित रही योजना तयार पारिने नगरपालिकाका प्रमुख प्रशासकीय अधिकृत मित्र प्रसाद घिमिरेले बताउनुभयो ।
दस वर्षे शैक्षिक योजना निर्माण पश्चात नगरको शैक्षिक अवस्थामा सुधार आउने नगरपालिकाले विश्वास लिएको छ । नगरपालिकामा हालसम्म सामुदायिक ५४, संस्थागत २ सहित ५६ वटा विद्यालय संचालनमा रहेका छन । नगरपालिकामा साक्षरता दर ६८.४ प्रतिशत रहेको छ ।
