रामेछापको उमाकुण्ड गाउँपालिका–७ भुजीकी शान्ति माया सुनुवारले ७६ वर्षको उमेरमा नेपाली नागरीकता पाउनुभएको छ । २००५ सालमा जन्मनुभएकी सुनुवारले बिहीबार जिल्ला प्रशासन कार्यालय रामेछापबाट नेपाली नागरिकताको प्रमाणपत्र प्राप्त गर्नुभएको हो ।
साबिकको भुजी गाउँ विकास समितिको वडा नं ७ की सुनुवारले नागरिकताका लागि यस अघि पनि प्रयास गर्नुभएको थियो । तर सनाखतमा तिन पुस्ते कोही जिम्मेवारी नभएपछि सुनुवार ७६ वर्षसम्म नागरिकता विहीन हुनुहुन्थ्यो ।
यो विषयमा जानकारी भएपछि उमाकुण्ड गाउँपालिका–७ भुजीका वडा अध्यक्ष रुद्रमणि नेवार र कार्यपालिका सदस्य मनिता सुनुवारको पहलमा बिहीबार सुनुवारले जिल्ला प्रशासन कार्यालय रामेछापबाट नेपाली नागरिकताको प्रमाणपत्र प्राप्त गर्नुभएको छ ।
शान्ति मायासँगै साबिक भुजी गाउँ विकास समितिका ३० वर्षका धनराज सुनुवारले पनि नेपाली नागरिकता प्रमाणपत्र प्राप्त गर्नुभएको छ । उहाँले पनि तीन पुस्ते सनाखत नभएकै कारण नागरिकता पाउनुभएको थिएन ।
दुवै जनाको सनाखतमा वडा अध्यक्ष नेवार र कार्यपालिका सदस्य मनिता सुनुवार बसेपछि उहाँहरुले नागरिकता प्राप्त गर्नुभएको हो ।
