रामेछापको गोकुलगंगा गाउँपालिकाले पहिरोमा परि मृत्यु भएका तीन जना किशोरीको परिवारलाई सहयोग गर्ने भएको छ ।
बिहीबार राति पहिरोमा परी मृत्यु भएका गोकुलगंगा–६ फर्पुका तीन किशोरीका परिवारलाई राहत उपलब्ध गराउने निर्णय भएको गाउँपालिका प्रवक्ता एव् वडा नम्बर ६ का अध्यक्ष चन्द्रबहादुर सुनुवारले जानकारी दिनुभयो ।
गाउँपालिकाका अध्यक्ष काजिबहादुर खड्का (दिनेश)को अध्यक्षतामा शनिबार बसेको गाउँकार्यपालिको बैठकले उक्त निर्णय गरेको हो । मृतकका परिवारलाई प्रति परिवार ५० हजार राहत र १५ हजार काज किरिया खर्च सहित ६५ हजार नगद सहयोग प्रदान गरिने प्रवक्ता सुनुवारले बताउनुभयो ।
गोकुलगंगा गाउँपालिका–६ फर्पुमा अविरल वर्षासँगै बिहिबार राती बिमान तामाङको घर माथिबाट झरेको पहिरोमा पुरिएर बिमानकी १८ वर्षीया छोरी सिता तामाङ, पेमा तामाङकी १५ वर्षीया छोरी आशिका दोङ र बिमानको जेठा छोरा पदम तामाङकी छोरी लक्ष्मी तामाङको मृत्यु भएको थियो ।
बाढी पहिरोका कारण पालिकाभर भएको क्षति र सम्भावित क्षतिको बारेमा वडा र विपद् व्यवस्थापन समितिले स्थानीय प्रहरीसँगको सहयोगमा प्राविधिक विवरण तयार गरी त्यसको व्यवस्थापनमा लाग्ने गोकुलगंगा गाउँपालिकाले जनाएको छ ।
पहिरो पीडित परिवारलाई सहयोग गर्ने क्रम जारी
पहिरो पीडित परिवारलाई विभिन्न संघ÷ संस्थाहरुले समेत सहयोग गर्ने क्रम जारी छ । जिल्ला विपद् व्यवस्थापन समितिबाट २ लाख ५० हजार,नेपाली काँग्रेस रामेछापका सभापति एवं सांसद पूर्णबहादुर तामाङ (कान्छाराम) ले प्रति मृतक १०–१० हजारका दरले नगद रकम सहयोग गनुभयो ।
जिल्ला रेडक्रस सोसाइटीबाट लत्ता कपडा,भाँडावर्तन सहयोग गरिएको छ । त्यस्तै राष्ट्रिय युवा संघ नेपाल रामेछापले पनि खाद्यान्न सहयोग गरेको छ ।
