दिप बहादुर कार्की स्मृति प्रतिष्ठान रामेछापले विद्यार्थीलाई न्यानो कपडा र विद्यालयलाई विभिन्न पुस्तकहरु वितरण गरेको छ ।
आइतबार (आज) रामेछाप नगरपालिका वडा नं ७ सिम्लेमा रहेको सेतीदेवी आधारभूत विद्यालय र मुगानमा रहेको सिद्धेश्वर आघारभूत विद्यालयका विद्यार्थीहरुलाई न्यानो कपडा वितरण गरिएको हो ।
सेतीदेवी आधारभूत विद्यालयका २६ जना र सिद्धेश्वर आघारभूत विद्यालयका २५ जना विद्यार्थीलाई ट्रयाक सुट र मोजा वितरण गरिएको दिप बहादुर कार्की स्मृति प्रतिष्ठानका उपाध्यक्ष नारायण कार्कीले जानकारी दिनुभयो ।
साथै गौरीशंकर माविको पुस्तकालयका लागी करिब २ लाखको विभिन्न पुस्तकहरु उपलब्ध गराइएको उपाध्यक्ष कार्कीले बताउनुभयो । रामेछाप नगरपालिकाका प्रमुख लबश्री न्यौपानेले उक्त पुस्तकहरु विद्यालयलाई हस्तान्तरण गर्नुभयो । पुस्तक हस्तान्तरण गर्दै नगर प्रमुख न्यौपानेले ति पुस्तकहरु पढेर धेरैभन्दा धेरै ज्ञान लिन विद्यार्थी तथा शिक्षकहरुलाई आग्रह गर्नुभयो ।
दिप बहादुर कार्की स्मृति प्रतिष्ठानका अध्यक्ष कमल विक्रम कार्कीले आर्थिक अवस्था कमजोर भएका गरिब तथा विपन्न परिवारका २ जना बालबालिकालाई निशुल्क पढने व्यवस्था मिलाइएको बताउनुभयो । गौरीशंकर माविमा आफुहरुको सहयोगमा २ जना विद्यार्थीले निशुल्क पढदै आएको उहाँले बताउनुभयो ।
